Italy leh England an chak zo lo

Inrinni zana Euro 2024 khel tur zawnnaah team lian pahnih; Italy leh England in hnehna an chang zo lo. Euro 2022 finalist te an chak zawh loh laiin Belgium leh Sweden ten hnehna an chang ve thung.
European champion Italy hian Tose Proeski Arena-ah North Macedonia an hmachhawn a, hmahruaitu England hnaih tura chak an mamawh viau laiin an chak zo lova, an hma hun tur a chian loh phah leh zual. World Cup 2022 an khel phak lo tawh a, Euro 2024 an hmachhawn phak lo zui leh a nih chuan an tan mualphona lian tak a ni ngei ang.
North Macedonia an hmachhawn tum hian Italy tan Ciro Immobile chuan minute 47-naah hmahruaina goal a thun a, he goal hmang hian hun rei tak chhung hma an hruai. Immobile goal thun hi chakpui mai theih an inbeisei laiin hun tawp dawn hnaihah goal an chhuah ta tlat thung. Minute 81-naah Enis Bardhi chuan goal thunin North Macedonia si phurh a sut. Hemi hnu hian goal dang a luh belh thei tawh lova, an inhnehtawk zui ta a ni.
North Macedonia lakah an chak zawh loh leh tak vangin Italy hi Group C-ah pathumnaah an awm chhunzawm a, khelh thum atangin point li chiah an la hmu. An group a hmahruaitu England nen an inkarah point kua zet a tla zet tawh a. Pahnihna Ukraine chu point thumin an phak lo mek bawk. North Macedonia lakah chak zo lo mah se Italy hian lawmna tur pakhat an nei a, chu chu an chunga awm pahnih England leh Ukraine te an inhnehtawk kha a ni.
Euro 2020 final-ah Italy laka vanduai England hian an hnuai chiaha awm Ukraine chu Poland ramah an hmachhawn a, 1-1 in an inhnehtawk.
Ukraine hian England lakah bul an tan tha a, minute 26-naah Arsenal defender Oleksandr Zinchenko chuan hmahruaina goal a thun. Zinchenko goal thun hi minute 41-naah Kyle Walker-a’n a sut a, chawlhlawk hmaa goal hnih lut bak hi hun tawp thlengin goal dang a luh belh thei tawh lo.
England hian vawi 5 khel tawhin, point 13 an hmu a, point rukin hma an hruai fal mek. Ukraine in point 7 hnu tawhin, Italy leh North Macedonia ten point li ve ve an hmu a. Malta in point an la hmu ve lo.
Inrinni zana inkhel dangah Belgium chuan si khat faiin Azerbaijan an hneh a, Group F-ah hmahruaitu thar an ni. Belgium in Azerbaijan an hnehna goal hi minute minute 38-naa Yannick Carrasco thun a ni.
Group F atanga inkhel dangah Sweden chuan an khingpui Estonia chu si nga faiin an sawp. Sweden hian A. Le Coq Arena-a an hmachhawn Estonia lakah an khel tha viau a, goal an thun zawn zawt zawt. Minute 18-naah Viktor Gyökeres goal hmangin hma an hruai a. Hmahruaina goal an thun hnu hian Dejan Kulusevski, Alexander Isak, Robin Quaison leh Viktor Claesson ten goal khat theuh an thun leh bawk a, Mimualah awlsam takin point thum an hmu.
Group F-ah hian khelh li atangin Belgium leh Austria ten point 10 ve ve an hmu a, goal difference a tha zawk Belgium chu hmahruaitu an ni. Inrinni zana Estonia sawptu Sweden in point 6 hmuin pathumna an luah a. Estonia leh Azerbaijan ten point khat ve ve chauh an la hmu thung.