Box office-ah ‘The Nun 2’ a No.1

Box office-ah ‘The Nun 2’ a No.1
The Nun 2 chuan tun weekend kalta khan North America-ah cinema hall ticket hralhna atangin dollar maktaduai 32.6 a lalut a, box office No.1 a ni. The Nun 2 hi a film hmasa 2018-a an tihchhuah ‘The Nun’ khan opening weekend-ah dollar maktaduai 53.8 a lalut thei a, sum lakluh tamah a film hmasa zawk pha lo mah se tun weekend box office No.1 a ni pha ta tho a ni.
He horror movie hi 1956-a France a thil thleng anga tarlan a ni a, kumina horror mobie tlangzarh tawhah chuan opening weekend-a sum lalut tam ber dawttu a ni pha a, horror movie-ah chuan kumin March thlaa an tlangzarh ‘Scream VI’ chiah kha a pha lo a, he film hian opening weekend-ah dollar maktaduai 44.5 a lalut thei.
Kar kalta box office No.1 ‘Equalizer 3’-in dollar maktaduai 12.1 lalut lehin No.2-ah a tawlh a, he film hian ni 10 chhungin US-ah dollar maktaduai 61 a lalut tling ta.
Film tlangzarh thar ‘My Big Fat Greek Wedding 3’ pawhin dollar maktaduai 10 lalutin No.3-ah a debut.
Bollywood movie, Shah Rukh Khan channa ‘Jawan’ pawh a che tha viau a, US-ah opening weekend-ah dollar maktaduai 6.19 lalutin, No.4-ah a debut a, Bollywood movie-ah chuan North American box office-ah opening weekend-a sum lalut hnem thei ber a la ni.
An tlangzarh atanga weekend vawi riatnaah Barbie-in dollar maktaduai 5.9 lalut lehin No.5 a la ni a, he film hian US-ah dollar maktaduai 620 lalut tling tawhin, kumin-a film tlangzarhah chuan US-a sum lalut tam ber a la ni.

Box office top 10:
1 The Nun II $32,600,000
2 The Equalizer 3 $12,100,000
3 My Big Fat Greek Wedding 3 $10,000,000
4 Jawan Yash $6,191,506
5 Barbie $5,900,000
6 Blue Beetle $3,775,000
7 Gran Turismo: Based on a True Story $3,375,000
8 Oppenheimer $3,000,000
9 Teenage Mutant Ninja Turtles: Mutant Mayhem $2,600,000
10 Bottoms $2,051,560