Doja Cat ‘Paint the Town Red’ a Hot ber

On Sep 13, 2023 11 0

Doja Cat hla hit ‘Paint the Town Red’ chu Billboard Hot 100 (singles) chart-ah No.3 atangin No.1-ah a invawrh ta a, Doja Cat tan he chart-a a hla No.1 kai thei pahnihna niin, nikum August hnuah he chart-a rap hla a No.1 lehna hmasa ber a ni bawk.
Billboard Hot 100 (singles) chart hi kar khat chhunga US-a hla lar dan tehna a ni a, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Paint the Town Red’ hi kar khat chhungin stream maktaduai 27.7 leh download sales 8,000 a la tling a, radio lamah pawh ngaithlatu maktaduai 32.1 nei angin an chhut bawk a, hei hi chart ranking-ah a No.1 pui ta a ni.
Doja Cat hian May 2020 khan a hla ‘Say So’ featuring Nicki Minaj chu he chart-ah hian a lo No.1 pui tawh a, tun hi chart topper a nih vawi hnihna a ni ta a ni. He hla hi a studio album palina tur ‘Scarlet’ atanga a single niin, he album hi September ni 22-ah an tlangzarh ang.
Paint the Town Red hi August 2022-a Nicki Minaj hla ‘Super Freaky Girl’ he chart-a a No.1 hnua rap hla Hot 100 chart topper ni leh thei hmasa ber a ni a, country hlain he chart-a ro an rel lai a rawn titawp ta rih a ni. He rap hla a rawn No.1 hma, kar ruk chhung chu country hla a zawn zatin a No.1 tawh a ni.
Chart No.1 hlui Zach Bryan ‘I Remember Everything’ featuring Kacey Musgraves chu No.2-ah a tawlh ta a, he hla hia stream maktaduai 31.7 a la nei theia, kar liamta aiin 6%-in a tlahniam nain, Streaming Songs chart-ah chuan a la No.1 tho a ni.
Luke Combs-a’n Tracy Chapman hla hlui a cover ‘Fast Car’ chu No.2 atangin No.3-ah a tawlh a, Taylor Swift ‘Cruel Summer’ chu No.5 atangin No.4 a kai a, chart No.1 hlui Morgan Wallen ‘Last Night’ chu No.4 atangin No.5-ah a tawlh a, Dua Lipa ‘Dance the Night’ chu No.9 atangin No.6-ah a insawn a, SZA ‘Snooze’ chu No.7-ah bawk a la awm.
Gunna ‘Fukumean’ chu No.10 atangin No.8-ah a insawn a, chart No.1 hlui Olivia Rodrigo ‘Vampire’ chu No.12 atangin No.9 a kai thar leh a, chart No.3 pawh lo ni tawh Rema leh Selena Gomez ‘Calm Down’ pawh No.11 atangin No.10 a kai thar ve leh ta bawk.