Al Pacino leh Noor Alfallah te court-ah kal

Al Pacino, kum 83, leh a ngaihzawng Noor Alfallah, kum 29, te chuan an fa hrin thar chu a enkawltu zawk nih inchuhin court-ah an kal ta a, Al Pacino hian Hollywood-a hetiang nupa kar buai lama ukil hriathlawh tak, Adam Philip Lipsic a ruai nghal a ni.
Hollywood star Al Pacino leh Noor te hi nikum April atang khan an inzui tan a, kumin June kha fapa an nei a, hetianga fa an nei thut mai hian Al Pacino pawh hi a barakhaih deuh niin sawi a awm a, an inkar a fuh ta lo chhunzawm a nih hmel a, tunah chuan Noor hian an fa hi a enkawltu zawk nih tumin, an fa enkawlna tur sum leh pai phut nghalin, court lamah a zualko ta a ni.
Noor hian kar kalta khan court-ah an fapa, Roman, chu an thubuai a fel hmaa lo enkawl lailawktu nih dilna a theh lut tawh a, an fapa enkawlna hian Al nena thuneihna inang neih a remti a, mahse, a awmpuitu zawk nih a dil thung a ni.
Hetianga court lama an pahniha thubuai an nei dawn ni a a lan tawh mek lai hian Al Pacino leh Noor te hi an la inkawp zui reng tho niin sapram chanchibu te chuan an tarlang a, Al Pacino hian Noor hi nupuia neih a tum ni a sawi awm bawk.
Roman hi Al Pacino tan a fa palina a ni a, Noor tan a pakhatna a ni ve thung.