Cheng vbch.438 senna hna Defence minister-in hawng

Defence minister Rajnath Singh chuan Thawhlehni khan India ram hmun hrang hranga Border Roads Organisation (BRO) hmasawnna hnathawh project 90 a hawng a. Hemi zingah hian Mizorama hnathawh panga, cheng vaibelchhe 438 senna a tel.
Defence minister-in a hawn rual hian Aizawlah Project Pushpak chief engineer SP Kolipey hoin BRO hotute leh thuthar thehdarhtute nen hun hman a ni a. Mizoram hmun hrang hrang a an hnathawh hawn a ni chu lawmawm a tih thu chief engineer hian sawiin, Mizoram border-a khaw hrang hrang inkalpawhna tur kawng leh lei (bridge) siam nan cheng vaibelchhe 438 an hmang tih a sawi. Mizoram hmasawnna atana an hnathawh chu hmun kilkhawr leh thingtlang zawka awmten tangkai taka an hman a beisei tih sawiin, sawrkar kum kal mekah hmasawnna tur project pasarih an thawh leh tur thu a sawi a ni.
Zawngling atanga Mawhre leh Sapi kawng km.20-a thui, Kawlchaw atanga Phura leh Tawngkawlawng kawng km.30-a thui, Tuipang atanga Laki leh Lungpuk kawng km.47-a thui te chu Project Pushpak atanga an siam a ni tih SP Kolipey hian a sawi a. Heng bakah hian khaw hrang hrang inkalpawhna tur lei hmun hnihah an siam thu te, Lawngtlai atanga Diltlang leh Parva inkalpawhna tur Sekului lei leh, Sairang atanga Tuipuibari inkalpawhna tur Dampa lui lei an siam thu a sawi bawk.
He hun hi live telecast-a pek chhuah niin, Defence minister hian kawng (roads) 22, lei 63, lei hnuai kawng (tunnel) 1, airfield 2 leh helipad 2 a hawng a ni.
Dampa lui RCC lei, Tuipuibari Road ami hawnna hi Mamit bialtu MLA Er H Lalzirliana hoin a hmunah hman ve a ni a. Helai kawng hi hun rei tak, kum 20 dawn thuamthat loha awm tawh, helai ruama chengte tan harsatna namen lo thlen thin a ni tih MLA hian sawiin, lei rinawm leh kawngpui tha an nei dawn ta chu district hmasawnna a ni tih a sawi.