CYMA-in agency dik lo ho leh hursualna tihreh duh

Tunhnaia rampawna Mizo thalai hna thawk tura tirchhuak thei ‘agency’ intite leh social media lama hursualna kawng hrang hrang pholan tam ta lutuk tihreh a nih theih nan Central YMA chuan hma la turin Home minister an ngen.
Central YMA hruaitute hian Thawhlehni khan Home minister Lalchamliana an kawm a. Hun kal tawh leh tunhnaiah agency hrang hrangten thalaite eizawnna tha zawk ngaihtuahsak theia inzuar a, mi thahnem tak rampawna thawnchhuahte harsatna tawh mek chungchang leh, heng agency hrang hrangte chhuichiang a, hrem ngaite hrem a, Mizo hmeichhiate dinhmun hima an awm theih nana hma la turin an ngen.
Tunhnaiah mipat-hmeichhiat, hmeichhiat-hmeichhiat leh mipat-mipat hmansualna hluar chho ta leh heng hursualna hrang hrang mipui vantlang hmuh theiha social media platform – Whatsapp, Instagram, Youtube leh a dangtea hmuh tur a tam ta chu an ngaimawh thu Central YMA hian thlenin, heng hursualna lam vantlang hmuha pho chhuah a ni hi mipui vantlang zah lohna leh dan palzutna lian tak a nih thu thlenin, dan zawmlote zawngchhuak a, an phu tawk hremna pek an nih theih nan hma la turin Home minister hi an ngen a ni.