Lemchan thiam party hnawl ang – Dr Lallianchhunga

Mizorama BJP inti haw em em, Delhi tlanga BJP hotute bawkkhupa chibai buk hnial lo, lemchan thiam political party hnawl ngam an ngai tih Congress thupuangtu Dr Lallian-chhunga chuan a sawi.
Champhai South bial chhung Tlangsam Congress Unit huaihawtin Nilaini zing khan Tlangsam Bazar-ah street campaign neih a ni a. Congress thupuangtu hian central-ah BJP leh an thawhpuite paihthlak an nih theihnan tanrual a ngai tih a sawi a. India ram chu khawvel ram ropui ni thei tur chuan hnam tenau leh sakhaw te zawkte pawh thlamuang taka kan awm theih a ngai a, BJP sawrkar hnuaiah chuan hnam tenau leh sakhaw te zawkte nepchepin kan awm zel dawn, tiin, 2023 MLA inthlanpui chu thlarau indona a ni dawn a, Pathian nung betute tanrual a ngai tih a sawi.
Kan ram, kan hnam leh sakhua a dam khawchhuah a ngai a, Congress party dinchhan zinga pawimawh tak chu sakhaw zalenna a ni tih Dr Lallianchhunga hian sawiin, “Kan ram, kan hnam leh kan sakhua a dam khawchhuah theihna turin BJP leh a thawhpuite tawh phawt chu Mizoramah pawh kan hnawl ngam a ngai. Mizorama BJP inti haw em em, Delhi tlanga BJP hotute bawkkhupa chibai buk hnial leh hauh lo lemchan thiam tak political party hi i hnawl ngam ang u,” a ti.
Congress sawrkar kalta kha tehna hrang hrang atanga teh pawhin sawrkar tha tak a ni tih a sawi a. Champhai district-ah pawh sumdawnna boruak tha taka a kal thin thu te, hmasawnna ruhrel engemawzat an siam hman thu te, hengte hi a nihna ang taka hman tangkai a nih theihnan Congress party a sawrkar leh a ngaih thu te a sawi.