Ukraine-in Black Sea Fleet awmna bei ti

Russia chuan Ukraine in Crimea a Black Sea fleet te awmna chu missile 10 leh unmanned boat pathum hmangin a bei tiin a sawi.
Hei vang hian Sevastopol lawngchawlhna hmunah kangmei nasa tak chhuakin mi 24-in hliam an tawrh phah tiin Russia chuan a sawi bawk a.
Mocsow-in a dah governor Mikhail Razvozhayev chuan Ukraine ralthuam tam ber te chu lo dan hmanin a awm a ti thung a. Russian lawng pahnih a tichhia tiin a sawi bawk.
Razvozhayev chuan lawngchawlhnaa lawng alh lai thlalak media mite hmuh theihin a phochhuak zui bawk a. Chu thlalak chu social media hrang hrangah thehdarh zui nghal a ni bawk.
A hma pawhin Ukraine chuan Sevastopol a Black Sea fleet te chu a lo ber tawh a, mahse, tuna mi hi chu tum dang zawng aia nasa tia sawi niin a beih nan hian khawthlang ram pek long-range missile a hmang ngei nia ngaih a ni.
Ukraine missile in Sevastopol a Black Sea fleet te awmna a deng fuh hrim hrim hi Russia air defence tan chuan mualphona tling niin Moscow tan ngaihmawhawm tak a ni bawk a.
Hetih lai hian Russian drones te chuan Ukrainian grain port Izmail, Danube river kama awm chu an bei ve thung a.
Odesa region governor Oleh Kiper chuan mi paruk in hliam tuarin kangmei chhuakin tihchhiat pawimawh tak tak a nei tiin a sawi bawk a ni.