Chawlh lam la hawi lo Djokovic
Chawlh lam la hawi lo Djokovic
Open era an tih huna US Open mipa singles title la thei upaber Novak Djokovic hi tunah kum 36 mi ni tawh mah se professional tennis chawlhsan lam a la hawi lo nasa mai a, kum 23, 24 chhung chuan a chawl ve tawh em em ang tih a sawi!
Record siama Grand Slam title 24 la tling thei awmchhun Serb Djokovic-a’n a vanglai a la chen mek laiin a elpui kumhlun ni thin pakhat Roger Federer a chawl tawh a, a elpui lian dang Rafael Nadal lah hliamin a tihbuai ve reng avangin a chawlh puan hun kan thlir a ni tawh ber a, ‘Big Three’ boruak kha a reh tawh a, an member la chechhuak thei Djokovic erawh Pa-thianni liamta mai khan New York-ah a la vul chuk a, chawlh nena sawizawm a la ngai thei bau lo lehnghal!
6-3, 7-6(5), 6-3-a Ru-ssian Daniil Medvedev hneha Flushing Meadows title pali a lak tlin rual khan mipa leh hmeichhia sawi loa Grand Slam title 24 la tling awmchhun record dinglai a nihrualpui chiah a, chumi chinah chuan Djokovic chuan duhtawk a la ngah lo a, record malkhalh ngei duhin tennis inelna bansan a la tum lo.
Wimbledon-ah khan amah aia kum 16 zeta naupang Carlos Alcaraz khan a title 24-na tur dansakin, Djokovic-a hun a liam ve dawn tawha ngaihna a piang hman a, hnah tharin an thlak ve tawh dawn nia a lan hman hial hnuah US Open lam a hawi chhunzawm a, warm-up tournament pakhatah Cincinnati title a hlawhchhuak a, New York tournament atan pawh rin a rawn kai chho leh a, Flushing Meadows-ah chuan record dinglai a rawn nihrualpui ta hial a ni.
Chutiang mi chuan a hma hun a thlir a, “Kan hriat theuh angin player-te chu an lo lang a, an liam leh a, chu tho chu ka tawn tur a ni a, kei pawhin tennis hi ka la chawlhsan ve ang – kum 23, 24 chhung hian,” a ti.
Sawizawmin, “Hnah tharte an lo lang ang a, mahse, chumi hma chuan engngemaw entir tur che u ka la nei hlekin ka ring.
“Keimah leh keimah ngei pawh hi ka inzawt fo thin a, he’ng zawng zawng ka kal pelh hnu heti chen tawhah hian eng hi nge ka la mamawh cheu? Engtia rei nge ka la kal zel dawn? He’ng zawhnate hian ka lu a vit ngut ngut thin.
“Level sangah ka la khawsa mek tih ka hria a, he sport-a tournament lian berah hnehna ka la chang thei a, he infiamna hi ka la chhangkham lo a, top dinhmun ka la luah rih laia kalbo mai hi ka duh lo,” tiin tun dinhmuna chawlh lam a la hawi loh chhan a sawifiah.
Novak Djokovic hian thangthar tha za zawk a la palzut thei a, US Open trophy a hawn lehna kawng-ah pawh United States-a star naupang duhawm ber ber pahnih hnehin, quarter-final lamah kum 25 mi Taylor Fritz hnehin, semi-final match-ah kum 20 leka upa Ben Shelton a paltlang leh bawk.
Final-ah chalchang tawh zawk leh kum hnih liamta maia he khelmual ngeia a calendar Grand Slam tur dansaktu kum 27 mi Medvedev hmachhawnin, set hnihnaah Russian tang ve thei deuh mah se set hmasaber leh a pathumnaah Djokovic chuan harsatna a tawk lo a, kum 40 hnaih tawh lamah pawh level sang bera rorel turin a la fit tih a lantir a, chawlh lam a la hawi lo pawh hi a mawh lo e!