Kum li chhung atan Halep hrem
Kum li chhung atan Halep hrem
Grand Slam-a vawihnih champion ve tawh Simona Halep chu nikum US Open khelh laia damdawi hman phal loh a hman an manchhuah avangin kum li chhung tennis inelna hmachhawn thei lo turin an hrem.
Tennis Anti-Doping Programme bawhchhiaa a zun sample-a damdawi khap zinga mi roxadustat hmuhchhuah a nih avangin Halep ni nikum October thla atang khan hrem lailawk (Suspend) a lo ni tawh a, tuna hremna nghet puankhum a nih takah hian a hmaa hremna a lo tawrh tawh kha kum li hremnaah hian an chhiartelsak dawn a, chuti a nih chuan kum 2026 October ni 7-ah a inkhel leh thei dawn a, tah chuan kum 35 mi a ni tawh ang.
A chungchang ngaihtuahtu indepen-dent tribunal chuan tuna kum 31 mi ni mek Romanian hian tihpalh thilthu pawh ni lo, tum lawksa rengin damdawi hman phal loh zinga mi hi a hmang tiin thutlukna an siam a, Halep thung chuan an puhna la pha zelin, a chunga hremna tla chu infiamna huanga thuchhe remna sang ber Court of Arbitration for Sport lama khinlet a tum thu a sawi.
Halep chuan hremna tuar mek mah se training a la chhunzawm zel thu leh dik lo taka a hming tihchhiat a nihna atanga talchhuak turin a theihna zawng zawng a hmang mek tih a la sawi fan.
Romanian hian nikum kha a tan kum harsaber a la nih thu sawi chungin a dikna thailang tura a beih chhunzawm zel thu leh tennis game mawi tana a nun a hlan zel thu a sawi a; puh a nih dan sawifiahin, kum 2022 hard court season intan hma lawk khan a team ruahmanna anga a nutritional supplement ei thin a siksawi thu leh a thil eiah chuan khap zinga mi engmah a telh luih loh thu a sawi.
Chutih rualin a thil ei zingah khap zinga tel ‘roxadustat’ a lo tel tih erawh a pha lo a, supplement company khin a tum thu leh kumin kumtir lamah chawlhkar tin deuh thaw a in test chunga a negative zel thu a tarlang tel.
“He sport-a fihlim felfai duh mi ka ni a, kum 20 dawn professional tennis player ka nih chhunga tournament za chuang ka khelh tawh leh Grand Slam title pahnih ka lakna kawngah khan damdawi khap zinga mi ka hmang em tih enfiahin thisen leh zun test vawi 200 zet ka hmachhawn tawh a, a zavaiin ka la fihlim vek a ni,” a ti.
Professional Tennis Players Asso-ciation lam pawhin Halep thlavang hauh hian thuchhuah an siam tawh a, Halep case tihkhawtlai a nih dan leh kalpui a nih danah fair lo leh pawm theih loh a awm thu sawiin, a chunga hremna a khinlet chhoh zelna turah pawh an thlawp zui zel tur thu an sawi.
2018 French Open title a lak hnu, a kumleh maia Wimbledon trophy hawn zui leh Halep hi kum 2016 daih tawha drugs test paltlang zo lo Maria Sharapova hnu lama drugs test paltlang zo lo tannis player zinga langsar ber a ni.
A career-ah WTA tour singles title 24 la tling tawhin, prize money a hlawh-chhuah tawh pawh pound maktaduai 32.2 (USD 40.2m) a tling tawh a; kum 2017 leh 2018 chhung khan world number one dinhmun a luah tawh bawk.