Italy leh Spain in hnehna an chang

Thawhleh zan khan Euro 2024 khel tur zawnna neih chhunzawm a ni a, team lian Italy, Spain leh Belgium ten hnehna an chang hlawm.
UEFA Nations League semi-final an khelh vanga Euro khel tur zawnna khel tlem bik Italy hian Giuseppe Meazza-ah Ukraine an mikhual a, darkar chanve hmaa goal hnih an thun an chakpui. Italy hian tunhnaia England inhnehtawkpuitu Ukraine lakah bul an tan tha viau a, minute 12-na lekah goal an thun nghal. Italy tan hian Davide Frattesi chuan minute 12-naah hmahruaina goal a thun a. Amah vek hian minute 29-naah an goal hnihna a thun zui leh bawk.
Hma taka goal hnih an chhuah hnuin Ukraine an insiamtha a, minute 41-naah Andriy Yarmolenko chuan goal thunin an si phurh a sut then. Chawlhlawk hmain goal thum ngawt lut mah se, chawlhlawk hnu lamah goal dang a luh belh thei lova, Italy chuan 2-1 a hnehna changin, point thum an hmu ta a ni.
Ukraine laka chak Italy hian khelh li atangin point 7 an hmu a, Group C-ah pahnihnaah an inhlangkai. Group C-ah hian England chuan khelh nga atanga point 13 hmuin hma an hruai a. Khelh nga atanga point sarih hmu mek Ukraine chu pathumna an ni.
Thawhleh zana inkhel dangah Group A-a pahnihna ni mek Spain chuan Nuevo Los Cármenes-ah Cyprus an mikhual a,an mualah si ruk fai ngawtin hnehna an chang.
Spain tan hian minute 18-na lekah Barcelona rawlthar Gavi chuan hmahruaina goal a thun. Gavi goal thun hnu hian a khat mawi tawkin goal an thun a ni ta ber a, goal a lut zawt zawt. Minute 33-naah Mikel Merino chuan an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Spain an khel tha chhunzawm a, goal li an thun belh. Minute 70-naah Joselu chuan an goal lina a thun a. Hemi hnu hian Ferran Torres chuan goal hnih a thun a, Álex Baena-a’n goal khat a thun ve bawk.
Group C-a inkhel dangah Norway chuan an mikhual Georgia chu 2-1 in an hneh ve bawk. Norway tan hian Manchester City goal thun khawl Erling Haaland chuan minute 25-naah hmahruaina goal a thun a. Minute 33-naah Arsenal captain Martin Ødegaard chuan an goal hnihna a thun zui ve leh bawk a, Georgia goal neih chhun hi minute 90+1-a Budu Zivzivadze thun a ni. Norway an chak vangin Group C-a hmahruaitu Scotland an la tling chiang bik lova, an ngah ve det rih a ngaih phah.
Group F lamah Belgium chuan an mikhual Estonia chu singa faiin an lo sawp a, hmahruaitu Austria an lehpel a, hmahruaitu thar an ni.
Belgium tan hian Jan Vertonghen chuan minute lina lekah hmahruaina goal a thun a. Romelu Lukaku-a’n goal hnih a thun bakah Leandro Trossard leh Charles De Ketelaere ten goal khat ve ve an thun bawk a, an mualah hnehna lian an chang.