Poland in Santos an ban

Poland in Santos an ban
Euro 2024 khel tur zawnaa beisei phak lo Poland chuan an manager Fernando Santos chu an ban a, manager thar tur an zawng nghal.
Poland hian World Cup 2022 zawh hnu khan an manager thar atan Portugal manager hlui Fernando Santos an la lut. Santos hian Portugal a chetthatpui viau a, Euro 2016-ah a champion pui bakah UEFA Nations League-ah champion hmasa ber a nihpui bawk. World Cup 2022-ah team tha tak kaihruai mah se beisei angin an thleng sang lova, quarter-final-ah Morocco an hneh lo. World Cup atanga an tlak hnuin Santos hian a hna a kalsan zui nghal. Portugal a kalsan hnuin hna a nei zui leh thuai a, Poland in an la lut nghal zat.
Poland in beiseina sang tak nen la lut mah se Santos hnuaiah Poland in beisei an phak ta lo viau thung. Santos kaihhruaina hnuaia inelna vawi nga an khelh tawhah vawi thum ngawt an tlawm a, Euro 2024 khel tur zawnnaah Group E-ah palinaah an tlahniam hial tawh. An chungah hian Albania, Moldova leh Czech Republic te an awm. Khelh nga atanga point ruk chauh hmuin, an dinhmun chhe viau tawh mah se Germany in a thlen tur Euro 24 khelh phak beiseina an la nei a. An beiseina tisang thar leh zual turin manager thar hnuaiah siam tharna chan an tum dawn. Poland hian October tla hian an hnuaia awm mek Feroe Island an hma-chhawn leh dawn a, point thum hmuh ngei an tum ang.
Santos hian Poland a enkawl tirh lamah Germany chu friendly match-ah a hnehpui nghal mai a, Germany an hneh vangina an phur leh zual hle. Hemi hnu hian an zuih ta tlat thung. Santos hnuaiah hian Poland captain Robert Lewan-dowski chuan goal thum a thun hman a. Lewan-dowski hian ram tan goal 81 zet thunin, Poland tana goal thun hnem ber a nihna a tihzau belh zel.