Inter Branc YMA Volleyball

Mizoten infiamna kan ngainat leh kan uar zingah Volleyball hi a tel a. Team anga khelh a nih av^ngin football dawttu-ah Volleyball khel kan tam berin a rinawm. Mizote zingah football-in ngaihhlut a hlawh ber ngei ang a, boxing hi pahnihna a nih a rinawm a. Volleyball hian pathumna a luah lo a nih chuan pahnihna niin, pathumnaah boxing a chhuk thung ang. Chuti khawpa infiamna lar Volleyball-ah chuan intihsiakna hrang hrang a awm a. Tualchhung intihsiakna zingah Central YMA buatsaih ‘Inter Branch YMA Volleyball’ hian ngaihhlut a hlawh berin a rinawm.
Central YMA leh Mizoram Volleyball Association (MVA) te tangkawpin an buatsaih YMA Branch te Volleyball hmanga an inelna hi kum 1989 atang khan neih tan a ni a. Inelna hmasa ber hi mipa team te inelna bik a ni thung. Inelna hmasa berah hian YMA Brach 33 zet an tel a. Final-ah Bungzung leh Serchhip an intum a, Bungzung hian hnehna changin, YMA Volleyball intihsi^knaa champion hmasa ber an ni.
YMA Volleyball intihsiakna hmasa ber hian ngaihhlut a hlawh em av^ngin kum 1990 -ah inelna neih chhunzawm a ni a. Kum1990 atanga hian hmeichhe inelna telh tan a ni. Hmeichhe inelnaah hian Bungkawn hnehtu Champhai chu champion hmasa ber an ni. Hmeichhe inelna hi buatsaih ngun z^wk a ni ta hial a, kum 2022 thleng khan hmeichhe inelna hi vawi 21 buatsaih a ni tawh a. Mipa inelna hi kum 2022 thleng khan vawi 16 buatsaih a ni tawh bawk. Mipa inelna vawi 16 neih tawhah Hunthar chu hnuhma nei tha ber an ni.
YMA Volleybal-ah vawi thum champion a, vawi nga pahnihna ni tawh Hunthar hi kum 2005, 2009 leh 2022 -ah an champion a. Kum 2004, 2006, 2007, 2012 leh 2016 final-ah vanduaiin tlawm zawkah an lo tang tawh thung. Final vawi thum khela chak vek Maubawk chu champion ngun ber an ni thin a. 2022 champion Huntharin Maubawk hi an rawn nih rual a, tum nga ngawt pahnihna an nih tawh vangin Maubawk chungah an chuang thar a, YMA Volleyball-a hnuhma nei tha ber an ni ta a ni.
Kum 2022 -a YMA Volleyball hian dangdaina tak a nei a. Chu chu mipa lama champion Hunthar leh hmeichhe lama champion Bungkawn te hian Mipa leh hmeichhe lama champion ngun ber Maubawk leh Kanan Vengte record an nih rual ve ve. Hunthar hi Maubawk champion zat vawi thum an champion ta chiah a. Hmeichhe lama Kanan champion zat vawi sarih chu Bungkawnin an nihrual ve leh chiah bawk a. YMA Volleyball-a record nih rual kum a ni ber mai.
YMA Volleyball-a mipa inelna vawi 16 neih tawhah Branch pakua an champion tawh a. Chungte chu; Hunthar (2005, 2009 leh 2022), Maubawk (2007, 2014, 2016), Dawrpui Vengthar (1991, 1999), Bungzung (1989, 1993), Champhai (1990, 2004), Chanmari West (2001), Kulikawn (2012), Muanna Veng (2018) leh Ramhlun North (2006) te an ni.
Hmeichhe lama inelna vawi 21 neih tawhah champion thei Branch panga chiah an awm ve thung a. Chungte chu; Kanan (1995, 1998, 2002, 2005, 2008, 2009, 2016), Bungkawn (1999, 2000, 2001, 2012, 2014, 2018, 2022), Dawrpui Vengthar (1991, 2006, 2007), Electric Veng (2003, 2004) leh Champhai (1991, 1993) te an ni.
United Kingdom (UK) a football inelna pakhat ‘English League Cup’ khuan hming hlun a nei lo teh tlat a. Inelna sponsor tu a zirin a hming tih danglam mai thin a ni. Kum 2023 -ah hi chuan Carabao Cup tih a ni. Sponsor tu an neih changin inelna hming an tidanglam mai a. Sponsor tu an awm lem loh chuan ‘League Cup’ a ni leh mai thin thung. Chutiang ang deuh chuan YMA leh MVA te tang dunin an buatsaih Inter Branch YMA Volley Competition pawh hian hming hran han put chang a nei zauh thin a. Title sponsor neiin, a hming chu eng pawh vuah ni bawk thin mah se, ‘YMA Volleyball’ hi Mizote thinlung a thawh dan leh kan sawi dan awlsam ber a ni reng thung.