US-ah Taylor Swift a la lar ber

Taylor Swift chu kar khat chunga US-a zaithiam lar ber niin, Billboard Artist 100 chart-ah a No.1 a, he chart-a a No.1 tawh zawng zawng belhkhawm chu kar 79 a tling ta a, Artist 100 chart-a No.1 ni rei ber a nihna a sawh nghet zel e.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khata an album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album ‘Midnights’ chu kar khatah 45,000 hralh lehin Billboard 200 (albums) chart-ah No.5 a la ni a, a album dang ‘Lover’ chu No.9 niin, ‘Speak Now (Taylor’s Version)’ No.11, ‘Folklore’ No.12, ‘1989’ No.14, ‘Reputation’ No.17, ‘Red (Taylor’s Version)’ No.21, ‘Evermore’ No.31 leh ‘Fearless (Taylor’s Version)’ No.50 te chart-ah an la lang a, Taylor Swift hi zaithiam zingah Billboard 200 chart top 50-a tum khata album pakua chin lan thei awm chun a la ni a, hetiang hi tum 19 a tawng tawh a ni.
Billboard Hot 100 (singles) chart lama pawh a hla ‘Cruel Summer’ chu No.4 a la ni a., ‘Anti-Hero’ No.20 leh ‘Karma’ featuring Ice Spice No.24 te a la lang thei bawk.
Jimmy Buffett pawh a tih hnuah a hla leh album hralh a kal thar leh a, chart No.3-ah a invawrh kaia, Zach Bryan chu No.1 atangin No.2-ah a tawlh a, Morgan Wallen pawh No.3 atangin No.4-ah a tawlh a, Luke Combs chu No.6 atangin No.5-ah a insawn ve thung.