Kum 6 hnuailamte tan cirruculam thar siam

Mizoram puma naupang kum 6 hnuailamten kawng engkima hma an sawn theih nan ECCE (Early Childhood Care and Education) curriculum thar ‘Thiam bul tanna bu’ tih siam a ni a, Thawhtanni khan Social Welfare & Tribal Affairs minister Er Lalrinawma’n a tlangzarh.
Minister chuan tetlaia thil hriat hi a nghetin, puitlin thleng pawha kan hriat loh laia kan nun kaihruaitu a nih avangin, naupan laia zirtirna hi ngaihpawimawh a tul tih a sawi a. Rastriya POSHAN Maah 2023 hman mekah ‘Suposhit Bharat, Sakshar Bharat, Sashakt Bharat’ (India ram hrisel, lehkha thiam ram, ram chak) tih thupui hmanga hma lak mek zingah ‘Poshan bhi padhai bhi’ chungchang inhrilhhriat leh ‘Thiam bul tanna bu’ tlangzarh hun hman a ni tih a sawi.
“Tuna curriculum kalpui mek hi kum 2014 atanga hman tan a ni a, kan hmanna a lo rei tawh avangte, khawvel danglam zelah siamrem ngai a awm ve zel avang leh, National Education Policy a lo pian tak avangin, SCERT leh School Education department-te nena thawhhona azarah curriculum thar, ‘Thiam Bul Tanna Bu’ tia hming phuahin revised (siamthat) a lo ni ta a ni,” a ti.
Department of Women & Child an nih angin naupang hmasawnna, naupang thanlenna (child development) chu an department hmalakna pawimawh berte zing ami a ni tih minister hian a sawi a. Anganwadi Centre 2244 ah, block/ project 27-ah CDPO leh CO-te vilna hnuaiah leh district tinah DPO-te kaihhruainain ngawrh taka kalpui a nih thu a sawi a ni.
Kumtin September thlaa hman thin Rashtriya POSHAN Maah chu a tum rukna atan hman mek a ni tih a sawi bawk a. Ram hmasawnan leh mimal tin hrisel zelna atana buatsaih thin a ni tih a sawi.