“Rawng Chawhpawlh” tlangzarh dawn Film siam nan cheng nuai 14 sêng

Mizo thalai thian inkawm ngeih tak tak GreenRocketTV youtube channel atanga mizo mipui ten kan hriat lar em em te chuan an youtube video siam thin “Chhungkaw Chhehchhawl” behchhan in “Rawng Chawhpawlh” tih film an siam a. Zanin dar 7 hian an film tlangzarhna hun Vanapa Hall-ah an hmang dawn.
He film siamna tur atan hian cheng nuai 5 budget an siam a, an rin aia a hautak avang leh a uluk zual em avangin he film siam nan hian cheng nuai 14 lai an seng a ni. September ni 22 zan hian Vaivakawn, Chanmari, Serchhip Auditorium leh Saikuti Hall Lunglei ah te mipui en theih tura an chhawpchhuah dawn bakah ni 23 zan atangin Lersiaplay atangin a duh apiang tan man chawiin a en theih dawn a ni.
He film Director hi Abarim Lalrammawia niin, Director of Photography hi Samuel Lalrinnnunga a ni a, Production Designer hi Nathan Lalhruaitluanga a ni. Line Producer hi Angela L Sailo niin, 1st Assistant camera man hi Lallawmsanga a ni a, Make up artist hi Make up by Lanfel a ni bawk.
A changtute hi GreenRocketTV chhungkua atang in Tommy, Zoparmawii, Lalduhawmi, Lalchhandami, Thangbiakzuala, Zorammawia te an ni dawn a. An ni bakah hian mizo film dang a tawnhriat nei tha tak tak Maruata Hnamte, Eddie Tochhawng, Maruata Rawite, Rosangpuii Ralte, Vanlalawmpuia, Zomuansangi te an in lan dawn a. Tommy Rosangliana leh Zoparmawii te hi a changtunu leh changtupa ber turte an dawn a ni.
He film-ah hian chhungkaw chhehchawl te kara hmangaihna lo piang chhuak te tana in hmuh ve theihna awmchhun Gas lak ni leh tui kang nghah hun hlut zia a lang dawn a. Kristian teuh si, rinna hrang avang a khawtlanga inmil loh na leh inthen hranna awm thin pho lanna niin, kohhran rinna hrang vanga in en hranna kara nula tlangval hmangaihna hmuh tur a awm dawn a. Rinna hi thalai lam chuan in en hran nan hmang lo a, an inkawm theih dan te, thian inkar ah kohhran emaw rinna hrang a len ve loh dan te an tar lang a ni.