Colombia sorkar leh EMC-Farc te inbe dawn

Colombian government leh left-wing rebel group; EMC-Farc te chuan peace talk neih chhunzawma thla 10 inkahhai kalpui an remti.
EMC-Farc hi Revolutionary Armed Forces of Colombia (Farc) kum 1960 chhoa Communist party armed wing anga din peng a ni.
Left-wing rebel te kum 2016 a Farc leadership tena ralthuam tun an tih laia tung ve duh lote an ni ber a. Inkahhai hi October ni 8 atanga intan tur a ni.
Inbiakna hmasa ber EMC te nena neih tur chu north-eastern khua Tibu, Venezuela nena inrina bulah neih a ni ang.
Colombian President Gustavo Petro, Marxist rebel pawh lo ni tawh chuan Colombia-a hel pawl awm reng chu tihtawp a intiam a. August 2022 khan President niin remna a awm theih nan chak takin hma a la zui a ni.
Inbiakna tha a awm theih nan Pathianni kalta khan Colombia-a southwestern Cauca region-ah inbiakna neih hmasak phawt niin, hetah hian European Union, United Nations leh Oganisation of American States-te pawh an tel a ni.
EMC-Farc te hi tun hnaiah kum 2016-a Colombia sorkar leh Farc group tena peace deal an siam hnuah an lian chak hle a. Farc-te nena sorkarin inremna a siamah khan member 7,000 chuangin an ralthuamte tungin civilian nunphung pangngai an zawm a ni.
Hei vang hian EMC-Farc-te chuan Farc tena an rauhsan hmun tinte chu chang zuiin an inla lian a, EMC group te chu sorkar chuan cocain trafficking, illegal mining ti-ah leh Colombian sipaite beiah a puh a ni.
EMC-Farc te nen hian 31 December 2022 khan inkahhai siam a ni a, mahse a hnu lawkah May thlaah thil duhawm lo thleng avangin inkahhai chu tihtawp a ni zui a ni.
EMC-Farc te hian member 3,000 vel an nei anga ngaih a ni a, Colombia hmun tinah inzar pharh mahse Caqueta, Guaviare, Meta leh Putumayo te chu huhang nghah zualna an ni.