Elementary-a science & maths zirtir thei dah turin hma lak rel

Elementary school-a science leh mathematics zirtir thei (qualified teacher) dah a nih theih nan Science Teachers Association Mizoram (STAM) chuan hma lak a rel.
STAM hian Ningani khan Aizawlah general conference an hmang a. An thurel zingah zirlai harsate chhawmdawl nan STAM Educational Foundation siam; elementary school-a science & mathematics zirtir thei dah a nih theih nan hma lak; class IV leh class VIII promotion exam-ah common questions hmanga exam buatsaih a nih theih nan hma lak; Zoram Medical College-ah PG diploma zirna hawn a nih theih nan hma lak leh, STAM bultumin Science Teachers Award siam te pawm a ni.
Conference hmanpuitu School Education director Lalsangliana chuan hun kal tawhah science zir ngam an tlem thin a, tunah erawh sawrkar leh STAM hmalakna azarah science zirlai an pung a, Mizo ngei science zirtirtu an thahnem ta tih a sawi.
Kum 2022 chhunga Mizoram Science Journal-a thuziak tha ber (Best Article) leh thuziak thawh hlawk ber (Best Contribution) lawmman hlan a ni a. Dr Vanlalhruaia Pachuau ziak “Engtin nge ramsa an kah mut thin” tih thlan a ni. Dr Laldinpuia, MZU chu “Best Contribution Award” pek a ni. Award hian citation, memento leh sumfai a kengtel a ni.
Conference-ah hian science zirna atana thawk tha, Children’s Science Congress district coordinator leh STAM member, State Teacher Award dawng mi pahnih – Govt. High School New Siaha zirtirtu Lalropuia Chinzah leh Govt. Lunglei High School headmaster F Lalhmangaihthanga te hnenah chawimawina an hlan bawk.
STAM-ah hian primary school atanga university thlenga science zirtirtu member 528 an awm a ni.