Rahul-an State pathumah chak inring sa

Congress MP Rahul Gandhi chuan Delhi-a event huaihawtnaah an party chuan Telangana, Madhya Pradesh, Chhattisgarh leh Rajasthan assembly inthlan neih turah an chak tur thu sawiin, kum 2024 Lok Sabha inthlanah pawh BJP te chu an barakhaih dawn tiin a sawi bawk. hei bakah hian Congress-te chuan Karnataka inthlan atangin ‘zirlai pawimawh’ an zirchhuak tia sawiin, chumi atang chuan an insiam rem a ti bawk.
“Tun dinhmunah chuan Telangana-ah kan chak ngei ang a, Madhya Pradesh, Chhattisgarh-ah te pawh kan chak ang a, Rajasthan-ah pawh kan hneh khawp ang a, kan chak theih ka beisei. Chu chu BJP-te pawhin an party chhunga an sawi dan a ni” tiin Rahul Gandhi chuan a sawi bawk.
Karnataka inthlan atanga zirlai an zirchhuah chu tia sawiin, Congress president chuan BJP-te chuan inthlanah midang tibuaiin an duh anga che thei lova siamin an chak phah a ni a ti.
“Karnataka-ah khan inthlanah BJP tena an duh anga thil an kalpui theih miah lohna turin chet kan la a. vawiina in hmuh tak chu Bidhuri leh thawklehkhatah Nishikant Dubey te inlarin, hengte hi BJP tena Caste census chungchanga rilru lakpen tuma an chetlakna a ni. Mipui ten an duh ngawih ngawih a ni tih an hria a, mahse sawihona neih an remti thak lo” tiin Rahul Gandhi chuan tun hnaia BJP MP Ramesh Bihuri-an BSP MP Danish Ali chu Lok Sabha chhunga communal lam hawia a aukhum tia sawi chungchang a sawi a ni.
“Dawhkan kila sawiho tur kan chhawp chhuah reng rengin, rilru lakpenna lam an zawng ziah a, tunah chuan chetlak dan kan thiam tawh” tiin Gandhi chuan sawi bawk. “BJP ten media an thunun awk si a” tia sawiin mipuite rilru sukthlek thunun tumin chet an la a ni tiin a sawi bawk.
Pratidin media Newtwork of Assam tena conclave an buatsaihah hian Rahul Gandhi chuan ‘One Nation, One Election’ chu mipuite harsatna tak tak laka rilru lakpen tumna a ni a ti a. “BJP tena distration strategies an neih zinga pakhat a ni” a ti bawk.
India-in harsatna a tawh mek chu hausakna mi tlemte kuta lut vek te, hausakna insemzai dan inbuk hleih turu lutuk te, unemployment turu takte leh lower caste, OBC leh tribal community-te duhsak lohna te bakah thil man sang a ni, tiin a sawi bawk a ni.
“Hengahte hian BJP ten sawi theih an nei lo. Bidhuri hian a duh duh sawi se. |angrualin inthlan hmachhawn ila. India hming hi thlak ang u an ti a. Hengte hi rilru lakpen an tumna vek a ni a, kan hria a, kan man fiah em em a. An duh anga an tih kan phal dawn reng reng lo” a ti bawk.
Rahul Gandhi chuan opposition party-te chuan ‘financial leh media beihna’ an tawh mek thu sawiin chuti chung chuan an chetthat em em tho thu a sawi bawk.
“India rama sumdawngte zawt ula, opposition party an thlawpin eng nge an chungah thleng. Oppostion te hnena cheque an pe a nih chuan an chungah eng nge thleng zawt teh” tiin a sawi bawk.
“Idea of India humhim tumin hma kan la mek a. Chuvang a nia kan hmingah pawh INDIA kan invuah reng ni” tiin Rahul Gandhi chuan a sawi bawk a. “BJP ten media an thunun a. Opposition te hi kan inher rem thei a, kan thawkho mek a, India mipui 60% lawih kan ni a. Kum 2024 inthlanah BJP te hi kan barakhaih dawn a ni” tiin Rahul Gandhi chuan a sawi bawk.
Hei bakah hian tun hnaia Ladakh a tlawh chungchangte pawh sawiin Bharat Jodo Yatra chu kawng hrang hranga kalpui dan an neih zel thu a sawi bawk a. Kanyakumari atanga Kashmir thlenga 4,000 km ke ngat a kalah Rahul Gandhi chuan kum zabi 21-ah Idnia communication architecture chu BJP ten an thunun hneh hle a, India mipuite kaltlang lo chuan engmah sawi ngaihna a awm lo a ti bawk.
“Ka Youtube channel, Twitter te thlengin rahbehin a awm a, yatra nei lo thei lovin min siam a ni. Opposition ten eng pawh sawi se kawiher danglam lovin national media a thleng thei lo” tiin a sawi bawk.
“Kan hmuhchhuah tak chu old school communication kalpuia a tak ngeia mipuite nena intawn a ni mai a, chu chu modern era-a Mahatma Gandhi kalpui kha niin tun hmaa tih thin dan kha tunah a lo la tha reng” tiin a sawi bawk.