Kan sawrkar chuan BJP thlawp lo tur MP awmsa – MPCC president

Mizoramah Congress a sawrkar chuan central-a BJP thlawp lo tur Mizoram MP pahnih kan nei sa dawn tih an party president Lalsawta chuan a sawi.
September 22-a Lunglei Congress Bhavan-a inkhawm a hmanpuinaah Lalsawta chuan kumin inthlanpuiah Mizoram mipuiin kan ram kan hnam, kan sakhua chhan turin tha kan thawh ve dawn em, tih ngaihtuah a ngai tih a sawi. “Congress kan sawrkar tir chuan BJP thawhpui ngailo tur MP pahnih kan nei thei anga, kan ram kan hnam kan sakhua a him theih nan Congress candidate-te kan thlantlin a ngai. BJP thawhpuitu MNF emaw BJP thawhpui mai tur regional party tho ZPM kan thlantlin chuan kan ram, kan hnam leh kan sakhua tan a him dawn lo,” a ti.
BJP chu sum leh thuneihna an hman nasat avangin an hlauhawm hle tih MPCC president hian a sawi a. Hmarchhak bikah chuan Mizoramah chiah an duh angin an che thei loa, a chhan chu anmahni thawhpuitu MNF-in Mizo mipui laka BJP thawhpui anga lan an hreh vang niin a sawi. Hetihlai hian ZPM pawh an sawrkar chuan BJP thawhpui bak tih tur an neilo niin a sawi bawk. Nakuma sawrkar laipui inthlan turah Congress kaihhruai an sawrkar ngei dawn avangin Mizoramah pawh lungsi taka an thawhpui theih tur Congress sawrkar tir a ngai tih a sawi a ni.