Kum chawhnu lamah Meth man tur pung

Ruihhlo hlauhawm meth lakah Mizoram a la him nia ngaih a ni a, mahse man tur chu a awm deuh reng. Tun hnaiah a pung a nih hmel a, kumin kum chawhnu lamah meth hi man tur a pung niin a lang.
Mizoram Excise & Narcotics (MEN) department chhinchhiahna enin, July thla thleng khan meth hi kg 32.933 an man a, August-ah kg 9.782 an man belh leh. August thla thleng hian kuminah kg 52.715 an man tawh.
May thla thleng khan MEN department hian kg 4.056 an man a, June leh July-ah an man belh nasa; thla hnih chhung hian kg 28.877 lawih an man a, August-ah kg 10 dawn an man leh bawk.
Ruihhlo hlauhawm methamphetamine, khawlai tawnga meth an tih mai hi Mizoramah mamawhna a la awm lo nia ngaih a ni a, meth an mante pawh hi Mizoram pawna mi tur a nih thin thu MEN department hotute chuan an sawi.
Khawchhak lam atanga lakluh, Mizoram pawn hmun hrang hranga mi tur a ni a, Mizoram chu a tawlhna kawng a ni tih chu an sawi dan a ni. Meth vanga an mi manah Mizo an awm chang a awm a, mahse anni pawh hi a neitu ni lovin a kengtu leh a kawltu an ni thin tih an sawi. A neitu tak tak chu hnam dang an ni thin an ti.
Chiang taka zirchianna a awm lo na a, an mi mante sawi danin, meth hi India ram state thenkhat leh Bangladesh-ah tea ken tur a ni thin a, Mizovin Mizoram pawna an pek tur ni lovin hnam dangin Mizorama an rawn lak tur a ni tlangpui tih an sawi.