Insumdawn tawnna hlawkpui ve turin sumdawn zir a ngai – Dr Lallianchhunga

India sawrkarin Mizoram kaltlanga Asia khawchhak lamte nen insumdawn tawnna kalpui a tumnaah Mizoram mipuiin a hlawkna tel tur zawnga inbuatsaihin, sumdawn dan pawh kan inzir a ngai tih Congress thupuangtu Dr Lallianchhunga chuan a sawi.
Thawhtannia Champhai South bial Melbuk leh Zokhawthara Congress Unit huaihawt street campaign-ah MPCC thupuangtu chuan Champhai leh a chhehvel chu khawchhak ramte nena insumdawn tawnna kawtchhuah atan sawrkar laipuiin a buatsaih mek a. Inkalpawhna, National Highway-6 pawh a buatsaih mek tih a sawi.
“He insumdawn tawnna liantham tak tur hi kan pumpelh dawn loa, a hlawkna tel tur zawnga inbuatsaih hi kan tih tur zawk a ni. Hnamdangte insumdawn tawnnaa a lo thlirtu ringawt kan ni bik tur a ni lo. Sumdawnna kawngah hnamdangten min chimral loh nan sumdawn dan pawh kan inzir chawp zel a pawimawh a. Mizo thluak hi hnamdangte thluak aiin a nep bik lo” a ti.
Nakum Lok Sabha inthlanah Congress party kaihhruai INDIA chu Central BJP paihthla turin a inbuatsaih a. Mipui ngaihdan lakna zawng zawng deuhthawah chak tura rinkai a ni tih Dr Lallianchhunga hian a sawi a. Central-ah Congress kaihhruaiin sawrkarna a siam chuan khawchhak nena insumdawn tawnna dinhmun pawh a that leh a beiseiawm, tiin, khawchhak nena insumdawn tawnna hringtu chu Congress sawrkar a ni a, a hringtu ngeiin chhungkaw sang tam tak harsatna hi a chingfel mai dawn tih a sawi a ni.
Kohhran mipuiin India ramah Chanchintha puandarhna atan theihtawpin kan sum neih remchan angte kan thawh thin laiin, Central BJP sawrkar hnuaiah missionary-ten nekchep leh dodal an tawk nasa tulh tulh a. India chu sakhaw hrang hrang zalenna ram a nih leh theihnan Mizo mipuiin Congress party kan thlawp a ngai tih MPCC thupuangtu hian a sawi.