Khum 100 awm Hospital hawng

Khum 100 awmna Mamit District Hospital thar chu Thawhlehni khan Health & FW minister Dr R Lalthangliana’n a hawng.
Mamit chu India rama aspirational district 115 zinga pakhat a nih angin, thlurbing pawimawh tak tak pahnih – hriselna leh zirna ngaihpawimawh a tel tih minister hian a sawi a. Hei hian hamthatna tam tak a kengtel a, he hospital dinna atana sum hman chungchangah uluk takin bialtu MLA leh a thawktuten hma la in, infrastructure din piahlamah bungrua, khawl leh thildang bun nan funding hi hman ni a, bungrua thenkhat la bun belh a ni dawn bawk, tiin a sawi.
Mamit bakah Siaha, Lawngtlai leh Champhai District Hospital-ah khum 100 dahna hawn a ni tawh a, Serchhipah sak mek niin, Kolasib District-ah khum 100 awmna tur sak mek a ni tih a sawi. Zoram Medical College leh Champhai Hospital-ah Covid-in a hrin chhuah natna khirhkhan bik, Critical Care Block buatsaih a ni tih a sawi bawk.
Mamit District Hospital hi Rs. 16,93,35,000 sengin Zamzo Engineering, Construction & Consultancy-in a sak a ni a, 2020 September 4-a sak tan niin, 2022 September-a zawh tura tih a ni. Zopa chhiara chhawng 5 a ni a, first floor-ah hian kum upate enkawlna tur – Elderly Ward dah a ni. Male & Female Ward bakah ward dangte dah a ni.