San Siro chhuahsan tum AC Milan

Serie A club lian AC Milan chuan Inter Milan nena an khelmual in-tawm San Siro chhuah-sana mahni pual liau liaua mipui 70,000 thut lenna tur stadium puah an tintuah.
San Siro hi kum 1926 atanga 1935 thleng khan AC Milan ta bil niin, a hnuah Municipality of Milan chuan neitu nihna an chang ta a; Milan khaw team dang Inter-nazionale-in home atan an hmang chhunzawm ve ta bawk a, team pahnih inthuruala chei-that tumna awm thin mah se kum 1990 World Cup hnu lamah khan tunlai thiamna leh hmanraw changkang zawk nena he stadium hi thuamthat a ni leh ngai ta lo.
AC Milan chuan tunhnaiah San Siro home atanga inlak-chhuaha Milan khaw chhim lama stadium thar sak an tum thu hi puangin, city council hnenah rawna hmasa pawh an thehlut fel tawh tih an thuchhuah chuan a tarlang.
Kumin August thla mai khan Milan khuaa thil hlui humhalhtu pawl (local heritage co-mmission) chuan an rama khelmual hming-thang ber chu an hnam nun nena inzawm tlat a nih avangin thiaha tuaithar chi a nih loh thu an puang a, a luahtu team pahnihte pawh stadium tunlai zawk an duh dawn a nih chuan hmun dang zawng mai turin an hriattir a, Milan-in stadium thar reh an titlu ta a ni.
Stadio Giuseppe Meazza tia hming dang an puttir bawk San Siro hi thir hmanga siam beam sen inkawkalh nuk leh a sak dan danglam avang hian khawvel hriat a hlawh a, mahse, stadium chhunga hmanrua leh a saknate hi a hmanlaiin, a hlui tawh hle a, thuam-that ngai tak vek an ni.
A thuamthat man pawh hi a sang dawn hle a, hei vang hian Inter leh AC Milan chuan stadium siam-that lam ai chuan hmun danga inbawk-hranna tur kum tam tak chhung khan an lo ngaihtuah tawh a, Mi-lan chuan thuchhuah siamin an kalbo tur thu an nemnghet ta nge nge a ni.
Kum 2021 khan club pahnih hian seat 60,000 awmna tur stadium thar chu tuna a hmun ngaiah bawk hian sak an rel a, mahse, dodalna hrang hrang an tawh tak avangin an puitlin zo lo a, thla hmasa maia heritage commission lamin thiah a rem loh tur thu an puan tak hnu phei hi chuan Inter Milan pawhin hmun dang an dap gawrh zual tura ngaih a ni a, Milan chhim lama khaw lian lo tak Assa-go an tih hmunah khel-mual thar tur hi an en ve mek tih hriat a ni.