Ukrainian FA-in Russia tum lo tura ngenna thawn chhuak

Ukrainian FA-in Russia tum lo tura ngenna thawn chhuak
Tunhnaiah Europe football thuneitu sangber Uefa chuan Russia-in Uk-raine a run hnua a vawi-khatna atan European U17 compe-tition-a Russia Under 17 team an chhuah ve a phalsak ta a, Uefa ngaihdan chuan thla 19 kaltaa Ukraine an run avang khan Russian rawlthar leh tleirawlte chuan puitling angin an tuar zui zel tur a ni lo tiin ngaihdan thar an siam a, hei hi Ukrainian FA chuan pawm thei loin European association zawng zawngte hnenah ziakin youth level-a Russia U17 team hmachhawn lo tura ngenna an thawnchhuak vek.
February 2022 khan Belarus thlawp-nain Russia chuan Ukraine a run a, kha vang khan infiamna hrang hrangah Russia leh Belarus hrek an ni a, mahse, Uefa chuan Russian U17 team-te chu European U17 competition-a an chhuah ve a phalsak ta a ni.
Hetih lai hian Ukrainian FA bakah England ram football thuneitu Football Association chuan Uefa thutlukna hi a pawm thei lo a, tournament-ah an lo chhuak tlang a nih pawhin England team chuan Russia an khel dawn lo tiin thuchhuah an siam ve nghal.
FA thupuangtunu chuan Uefa age-grade competition-a Russia thunleh chu an thlawp lo tih sawiin, England team-in Russia hmachhawn loh an kalpui chu an chhunzawm zel dawn tih a puang.
Tarlan tawh thin angin, Uefa chuan indoa chhuah hnu khan Russian team tawh phawt chu European competition zawng zawnga an tel ve a khapsak a, 2022 Champions League final khelhna tura ruat Saint Petersburg leh 2023 Super Cup khelhna tura tihfel tawh Kazan-te pawh sut niin, Russia sawrkar enkawl energy giant Gazprom atanga sponsor-ship contract an lo ziah fel vek tawh pawh an titawp vek a ni.
Tunhnaia Russian rawlthar mipa leh hmeichhe team laka khapna a hlih thu a puan rualin Uefa chuan dan loa Russia-in indona a kalpui chu a la dem reng thu leh Russian puitling team-te a ‘suspend’ mek chu a ngai anga kalpui chhunzawm tur a nih thu a nemnghet.
Uefa president Aleksander Ceferin chuan Russian adult team-te an la khapbeh chhan sawifiahin, tharum thawhna leh midang neksawrna an dodal tih lantirna a nih thu leh inda an tihtawpa remna leh muanna a awm hma chu puitling team laka hremna an kalpui zel tur thu a tarlang tel.
Under-17 male European Cham-pionship chu nakkum hian Cyprus rama khelh a ni dawn a, hmeichhe under-17 tournament pawh nakkum May thla hian Sweden ramah nghah a ni dawn bawk a, tah hian Russia team pahnih an inlan thei dawn a ni.