A lerah Real chho

League table-a hmahruaitu ni chho ve zak zak Girona khelmuala 3-0 hnehna changin Real Madrid chuan Spanish La Liga table-ah a sangber an luah chho a; lei fuh Jude Bellingham chuan Spanish giants tan goal khung lehin, league goal ruk nen top flight-ah top scorer a ni mek a, inelna dang nen belhkhawmin England international hian season kal laiah a club thar tan goal sarih a khung tling tawh.
He inkhela goal hmahruai hi minute 17-a Joselu tihluh niin, Bellingham-a ball pek tha zet hrinchhuah a ni a; a hnu rei vak loah Aurelien Tchouameni chuan Toni Kroos chhawpsak atangin mikhual goal hnihna a thawh ve leh a, half time-ah Real hian sihnih faiin hma an hruai phawt.
Real goal hnihna hi second half minute 71-a Bellingham tihluh niin, goal hmahruai khungtu Joselu siamsak a ni a; he hnehna hmang hian Madrid chuan Girona leh Zirtawpnia Sevilla hnehtu Barcelona lehpelin table-ah hma an hruai.
La Liga fixture hnuhnungbera table hmahruaitu Girona lamin Inrinni zan inkhelah hmahruai theihna hun remchang tum hnih ngawt an bawhpelh a; Yangel Herrera leh Viktor Tsygankov-te’n tauhluh theihna hun tha an hlah.
Hun pekbelhah Real player Nacho chu zawnchhuah ngai khawpa Portu a tihnat avangin hnawhchhuah a ni a, mualneitu team-in a tam zawk an nihna an chhawr hman lo thung.
Real goal hnihna khungtu kum 20 mi Bellingham kha tun kum zabi kal laiah Real Madrid player zinga La Liga match khelh hmasak vawi sariha goal ruk thun tling thei pahnihna niin, a hmasa zawk chu kum 2009-a rawn langsar Cristiano Ronaldo kha a ni.
Carlo Ancelotti team Real hian Thawhlehni Champions League group match-ah Napoli an luhkhung zui leh ang.hrang hrangah buat-saih mek zel a ni a, vawiin hian Lungleiah leh Kolasib-ah buatsaih leh a ni ang.