‘Jawan’-in vbc 1000 lalut tawh

Shah Rukh Khan channa ‘Jawan’ chu an tlangzarh atangin thla khat ni tawh mah se box office lamah a la che tha tluang zel a, tun Pathianni kalta khan cinema hall ticket hralhna atangin cheng vaibelchhe 8.80 a lalut leh, heti hian India-ah ringawt Hindi, Tamil leh Telegu tawnga an dub zawng zawngin sum a lak luh chu ni 25 chhungin cheng vaibelchhe 604.25 a tling ta a, khawvel huapa a lakluh chu cheng vaibelchhe 1068.75 a tling tawh a ni.
‘Jawan’ hlawhtlinna hian a director Atlee pawh a tiphur hle a, a film chhunzawmna siam leh te pawh an sawi ri ta vuai vuai mai, Atlee chuan, “Jawan boruakah hian ka la cheng a. Ka film siam te hi chhunzawm leh remchang deuh hian a tawp thin a. Raja Rani atanga Bigil leh Jawan thlengin. Mahse, a chhunzawm lehna tur ka ngaihtuah ngai lo. Mahse, tun tum chu, Jawan bikah hi chuan a chhunzawmna a awm dawn leh dawn loh zawhna ka dawng nasa a. A entu lamin an kham lo a, tuna a boruak hi han dai phawt se, a chhunzawmna a awm dawn leh dawn loh chu kan la ngaihtuah ang chu,” a ti.
‘Jawan’-ah hian Nayanthara, Vijay Sethupathi, Priyamani leh Sanya Malhotra, Deepika Padukone leh Sanjay Dutt te pawh an inlan a ni.
‘Jawan’ dawtah hian SRK hi Rajkumar Hirani film siam a a channa ‘Dunki’ a lo chhuak leh dawn hnaia, December ni 22-a tlangzarh tur a ni a, Taapsse Pannu leh Vicky Kaushal te nena an channa a ni.