Tuichawng biala ding lo tur DD Chakma rilru a na

Inthlanpui lo awm turah Tuichawng biala MNF can didate ni tura tihfel a nih hnuah an thlak a, DD Chakma rilru a na; party thenkhatin an be zui nghal bawk.
Nomination Committee-in candidate a nih tur thu an hrilh tawh thu leh a campaign tawh thu a sawi a, October ni 4-ah candidate puan a ni dawn a, chuta tel tura tih a nih thu sawiin, Aizawl a pan laiin a aiah RM Chakma an ruat tih a hriat thu te a sawi.
“Ka rilru chu a na a… mak ka ti alawm,” a ti a, “Ka campaign tawh a, induction ka tih pawhin mi 1581 ka lawmlut a,” a ti a, MNF candidate ni se MNF chu awlsam takin Tuichawng bialah an tling ang tih a rin thu a sawi.
MNF atanga a chhuah loh thu a sawi a, Nilaini tuk pawh khan MNF president nen an inkawm tih a sawi.
Chutih rual chuan party dangin an bia tih a zep lo a, “Keiman tumah ka be lo a, anmahni’n min bia a,” tiin, phone-in party dangin amah an bia tih a sawi.
“ZPM leh BJP-in min bia,” a ti a, mahse “Decision engmah a awm lo. MNF ka ni a,” a ti.
Chakma Autonomous District Council-ah MNF-in MDC 18 an nei a, chung zinga paruk chuan MLA candidate atan an duh tih sawiin, RM Chakma duhtu MDC 12-te zinga pathum chu a lamah an let tawh tih sawiin, MDC pakua ve ve an nei angah a ngaih thu a sawi.
A kal zel dan tur chu amah duhsaktute nen an ngaihtuah dawn tih a sawi a, inthlana ding tura amah nawrna a nasat thu sawiin, “Tunah pawh mipuiin min nawr nasa lutuk a, tih dan tur pawh ka hre lo a,” a ti.
Tuna Tuichawng biala MNF candidate tur chu party atangin a bang hman a, ZPM-a luh a tum tih sawiin, chuti chung chuan MNF hruaitute’n an candidate atan an thlang tih a sawi a, “CADC-ah chuan mipuiin kan hre vek a, mipuiin mak an ti,” a ti.