MNF sawrkarin term thum chhungin dinhmun sangah school 1129 a hlangkai – Dr L Thangmawia

MNF sawrkarin term thum chhungin dinhmun sangah school 1129 a hlangkai
– Dr L Thangmawia
Term thum chhung MNF sawrkarah dinhmun sang zawkah school 1129 hlankai an ni tawh a; Mizorama sawrkarna chang tawh party zingah MNF chuan zirna an ngaipawimawh ber tih MNF Thalai president Dr L Thangmawia chuan a sawi.
MNF-in term thum sawrkarna a chan chhungin, school 466 provincialise a ni a, school 259 adhoc grant -in- aid a hlankai niin, school 404 chu lumpsum grant- in-aid a hlankai a ni tih MNF Thalai president hian a sawi a. MNF sawrkarin school dinhmun sang zawka a hlankai tawh chu 1129 a nih thu sawiin, Congress sawrkarin kum 10 chhungin school pakhat chiah provincialise-a a dah thu leh school 75 chiah lumpsum-a an dah hman thu a sawi.
MNF sawrkar chuan hrilen lai pawhin nasa takin hma a la tih a sawiin, mipui duhdanin school kal hun tih danglam leh a ni a, high school science leh mathematics zirlaibu Mizo tawng leh Sap tawnga an dah thu a sawi. India ramah hrilen laia MBSE Board exam offline-a kalpui thei awmchhun an nih thu sawiin, sawrkar school-ah uniform inangtlang hman tan a nih thu a sawi. Myanmar, Bangladesh leh Manipur atanga Mizorama raltlan, school naupang 9190 chu a thlawna uniform leh zirlaibu an pek thu a sawi a ni.
Term khat chhunga zirtirtu, head leh principal-a kaisang tam ber tum a ni tih Dr L Thangmawia hian a sawi a. MNF-in term thum chhung sawrkarna a chan chhungin college 12 provincialise-a an dah thu leh college 14-ten NAAC accreditation an neih hman thu a sawi a. College zirtirtu 140 chuang an lak bakah non-teaching staff 30 chuang an lak thu sawiin, ICFAI University leh Mizoram University chu MNF sawrkar laia din a nih thu a sawi bawk.
Tun term chhungin MZU Northern Campus tur Pukpuiah an buaipui mek tih sawiin, Covid lengah sum harsatna a awm avangin Finance ministry-in a la tifel thei lo tih a sawi.
Pu Zoramthanga kaihhruai MNF sawrkar chuan hri avanga sum harsatna a tawk chung pawhin zirna lamah theihtawp chhuaha hma a lak thu a sawi a. Sawrkar sikulah zirlai naupang nasa taka an pun belh thu a sawi a ni.

4RIPANS tih changtlunna tur cheng vaibelchhe 481 an nawr.
4Hindi zirtirtu 818 an la a, zirtirtu 614 chu head leh principal-ah an kaisang.
4National Education Policy (NEP) in kum 2030 thlenga tih zawh hman tur state-te a tuk atangin zaa 70 vel Mizoramin a tifel tawh a; NEP duhdan angin Mizoramin state university hranpa a neihna tur draft bill an buaipui mek.
4DIET building 4 sak zawh a ni a, zirlaiten sports lama hna an hmuh theih nan grassroot sports development programme centre 40 an kalpui tawh.
4ZMC chu National Medical Commission-in recognition a pek bakah ZMC atanga doctor zir chhuak mi 100 dawnin internship an ti mek.
4MNF-in district a tihpuitlin pathum – Khawzawl, Saitual leh Hnahthialah district education officer an dah a; Samagra hnuaia higher secondary school-ah stream 44 an hawn belh.