Engtin nge hmeichhia i biak tan ang?

I duh deuh i hmu a, mahse, a bulah chuan i ‘confi lo tlat zel te pawh a ni thei. ‘Chuti chuan ka ti ang’ ti a i lo inruahman lawk ve na zawng zawng te khan a hun takah an tlanbosan vek che a, sawi tur ber pawh hre loin, i tum loh deuh te i sawi leh nulh thin em? Eng nge sawi tur chu le.
A hmasa berah chuan i hmeichhe duh deuh bulah chuan a vawikhatnaah thu thlum leh mawi tak sawi tum kher suh, chutiang turin an beisei bik lo che tih hre phawt rawh.
Inbiak tanna (opening line) a pawimawh a, a pawimawh tih i hriat rualin, eng emawti deuh taka tawng vel a tul lo tih hria ang che. Nui deuh sang chungin, tawngkam pangngai takin “I tha maw,” tih satliah mai te pawh a tawk hle niin ‘How to Work a Room’ tih lehkhabu ziaktu Susan Roane chuan a sawi.
Dating counselor, ‘The Itty Bitty Breakup’ tih lehkhabu ziaktu ni bawk Amy Owens cuan, “Hmeichhia ten mipain a biakna tawngkam atangin awlsam tein a rilru puthmang an lo hrethiam mai thin. I nih loh anga lan i tum pawhin awlsam tein a lo man nghal ang. |awngkam mawi leh thlum tak pawh nise, nangma irawm chhuak ni lo, i by-heart a ni em, tih te pawh awlsam takin a man chhuak zung zung thei a ni. Chuvangin, a vawikhat nan chuan tawngkam ho te a biak pawh a fuh ber a ni,” a ti.
Roane chuan, “Mo lawmna hmunah tu emaw i duh deuh lo hmu ta ang la, engtin nge i tih ang, ‘Hi, Mike ka nia, moneitu lam ka nia, nang a eng lam nge?’ te han ti mai mai la. Chu chu inbiak tan nan chuan a tawk viau a ni,” a ti. Hetiang deuh hian kan hun tawn a zirin, thil hote ni a kan ngaih te kha hman thiam tur a ni.
Psychologist Joann Magdoff chuan, “Hmeichhia chu vawi khat inhmuhnaa ‘I hmeltha hle mai’ tih nghal tawl ai chuan a thawmhnaw lam fak sak a fuh zawk. ‘I ngun/zungbun/thi chu a va nalh ve’ tih te pawh a hmantlak zawk. Chu ringawt pawh chu hmeichhe tam tak chuan an hrethiam nghal ang,” a ti.
Magdoff chuan, “A hun mila thusawi tur ngaihtuah la, inkhel in en a nih chuan tute nge a tan zawk, tih han zawh mai te pawh inbiak tan nan chuan a fuh. Eng emaw tihpuina hmun a nih chuan nuam a tih leh tih loh han zawh satliah mai te pawh a tha,” a ti.
I nih loh anga inlan tum suh. I hriat loh pui hria anga awm tum suh. Hmeichhia chuan awlsam takin a man chhuak dawn tho tho. Vawikhat i biak tawh chuan a dawt leh tur chu a chhan dan che atangin a rawn kal ve tawh mai dawn a ni.
Taksa chetzia (body language) pawh a pawimawh khawp mai, mahse, hmeichhe tana ngeiawm chi a awm tih erawh hria la. Magdoff chuan, “I taksa chetze hmanga i lantir chu a rawn chhang let lo che a nih chuan kalthui vak suh. Eng emaw sawi paha i ban (arm) te a rawn khawih fuh fo a nih chuan, boruak a fuh tan tih hrethiam ang che,” a ti bawk.