Israel-in Gaza Strip kawng engkimah dangchat hmiah

Gaza Strip chuan supply a dawng lo a nih chuan humanitarian crisis tawng reng thei dinhmunah dingin Thawhtanni khan Israel chuan a hual fel vek tawh thu sawiin electricity, food, fuel leh tui pek an titawp vek dawn, an ti tawh a ni.
Kar kalta Inrinni atang khan tanpuina engmahin Gaza Strip-ah a lut tawh lo nia sawi a ni.
Israel-in Hamas te a chhanletna lamah Gaza-ah nunna chan 700 chuang an awm tawh a, mi sang chuangin hliam an tuar nia sawi a ni bawk a.
Gaza-ah hian mi maktaduai 2.3 vel chengin heng zinga 80% te chu Israel nena an inbkakaih reng avanga humanitarian aid-a innghat bur te an nia ngaih a ni.
Gaza hi Hamas te rorelna a ni a, mahse Israel chuan airspace leh tuipui kam tinte a thunun thung a, hei vang hian bungrua lut leh chhuak engkim a thunun vek a ni.
Gaza thenawm lawk Egypt pawhin luhna pawimawh thunun tlat bawkin Gaza hrektu zingah hian Egypt chu a tel ve tho bawk a.
Kar kalta Inrinni zing lam atang khan Israel chuan Gaza a supply lut tur a dang vek tawh a, heng zingah hian ei tur leh damdawi pawh a tel.
Stéphane Dujarric, spokesman UN secretary-general chuan healthcare worker thahnem takin nunna chanin tam takin hliam an tuar a, medical centre pasarih tihchhiatin a awm niin a sawi bawk.
“Water, sanitation leh hygiene facility tihchhiat avang hian mi 400,000 vel te chuan an tuar nghal a ni,” tiin Dujarric chuan a sawi a.
“Gaza Power Plant chu tunah chuan electricity lakna awm chhun niin chu pawh ni rei lo te hnuah fuel nei lo mai tur a ni,” tiin a sawi bawk.
World Food Programme chuan Palestinians 100,000 vel te tan eitur a pechhuak tawh a, hei aia tam hi tuam tum mek a ni bawk a. Israel in khuahkhirhna nasa zawka a kalpui hma pawh hian Gaza-a chengte chuan ei leh bar lamah leh tui thianghlim chawkluhna lamah harsatna nasa tak an tawk tawh sa a ni.
Thawhtanni lam daih tawh khan Israel Defence Minister Yoav Gallant chuan Gaza chu an hual beh vek tur thu a lo sawi tawh a. “Electricity, ei tur leh tui bakah gas te pawh a lut lovang a, khar vek a ni,” tia sawiin, “Ramsa kan bei a, an chetdan angin kan chet ve a ngai,” tiin a sawi bawk.
Israeli infrastructure minister pawhin Gaza-a water supply pek chu titawp nghal turin a ti bawk a. “Tun hmaa awm tawhte nakinah a awm tawh dawn lo,”a ti hmiah bawk.
Palestinian health ministry chuan, Israel-in khuahkhirhna a kalpui avangin hospital-te’n medicine, medical supply leh fuel te an tlachham nghal an ti a. Khawvel ram te chu power line tinung tur leh emergency thil damdawi, fuel leh power generator te pe turin a ngen zui nghal thung.
Hetih lai hian Israel chuan Gaza a beihna chu nasa taka chhunzawm zui zelin nasa takin bomb leh missile hmang ten a bei a, Gaza a beih tawha nasa ber tihiala sawi a ni a. A bik takin kar kalta Inrinni zing lama Hamas tena Israel an kah tanna hmun te chu a thlurbing nasa bawk.

Hren vangin Israel luhaina
Hamas te chuan, Israel-in bomb pakhat a thlak zelah an mi tang hren mek pakhat zel an tihhlum tur thu an sawi a. Hamas-te hian tun dinhmunah lung in tâng 150 vel a nei meka sawi niin chung zingah chuan naupang leh Holocaust survivor te pawh an tel a. Heng mite hi kar kalta Inrinnia chetlakna an neiha border town leh Kubbutzim a cheng te an mankhawm nia sawi a ni.
Hamas thupuangtu Abu Ubaida chuan, “Kan mite hriattir lawkna tel lova beih an nih chuan civilian kan hren te pakhat zel tihhlum an ni ang,” tiin a sawi a. An mi man zinga pali te chu an thi tawh tia sawi a ni a, an thih chhan erawh puan a ni lo.
Heng Hamas tena an man khawmte hi Israel sorkar tana luhaina niin Hamas te na taka beih let a intiamna thil a titim thei nia ngaih a ni. Hetih lai vek hian Israel chuan a sipai reserve nuai thum vel a ko haw mek thung.
Israel-ah chuan mipui nawlpuiin Prime Minister Benjamin Netanyahu an thlawp hle a. Opposition tin te pawhin an thlawp thu sawiin leader of Opposition ni mek Yair Lapid chuan, “Tunah tumahin politics an ngaihtuah lo a, awmzia a nei lo,” tiin a sawi.
Mahse, Hamas-in an mi mante him taka lak let a nih loh chuan Israeli te chuan an leader-te an dem dawn an ti thung a. Hamas mi man te him taka laklet leh chu ngaih pawimawh ber a ni rih tia sawi a ni thung.
Hetih lai hian Qatari mediators te chuan Israel lung in tang mek Palestinian hmeichhia leh naupang 36 te nena Hamas te man lung in tang te inthleng a nih theih nan hma a la mek tiin Qatar Foreign Ministry chuan a sawi a.
Thawhtanniah khan Netanyahu chuan Hamas te lakah indo a puangin, “Hamas terrorists te chuan naupangte pawh nghaisain an tihlum a ni. Hamas hi ISIS a ni,” tiin a sawi a. Israel Defence Minister, Yoav Gallant pawhin Gaza chu an hual beh vek tawh thu a sawi bawk.
Gaza Stip hi 365 sq km niin mi maktaduai 2.3 chenna a ni a, khawvela ram hual hneh berr niin khawvel huapa a ram nena chhuta mipui chen bitna ber a ni bawk.
Kar kalta Inrinni atanga indona chhuah hnuah nunna chan 1,600 chuang awm tawhin hliam tuar 6,000 chuang an awm tawh bawk a ni.

Iran-in Israel dem
Iran Supreme Leader Ayatollah Ali Khamenei chuan Israel beihnaah Iran-in inhnamhnawihna a nei lo tiin a sawi a. Mahse, Israel beitute chu fakin, “Zionist regime beitute kut chu kan fawp a ni,” tiin a sawi.
Iran hi sum leh paia Hamas te puitu ber an ni a, hei mai bakah hian training pea ralthuam petu ber a ni bawk.
“He lirnghing rapthlak tak hian Israel-ah critical structure pawimawh thenkhatte a tichhia a, awlsam tea siamthat theih mai loh tur a ni,” tiin Ayatollah Ali Khamenei chuan a sawi a. “He thil thlen chhana mawhphurtu chu Zionist regime te an ni,” tiin a sawi bawk.
Hetih lai hian West Bank-ah pawh Israeli forces leh Palestinian te inbeihna thlengin nunna chan pali an awm a, mi 295 in hliam an tuar niin UN chuan a sawi a. West Bank hi Gaza nena danglam niin Hamas te thunun a ni ve lo bawk.
Gaza bikah hian chenna mumal nei lo 187,000 an awm mek tia sawi niin an la pun belh zel tura ngaih a ni bawk a. UN school 83-ah mi 1,37,500 an awm meka sawi a ni bawk.
Gaza-a UNRWA field office pawh Israel airstrike-in dengin a tichhia tia sawi a ni bawk a. Mi maktaduai zahve velin tunkarah UN food ration pawh distribution centre te khar a nih avangin an dawng thei lo tia sawi a ni bawk.
Gaza Strip-a buaina hi a nasa tial tial tura ngaih niin hetih lai hian Hamas-te chuan Arab ram dangte chu pui tura ngenna a siam thung a. Arab ram dang ten an pui ang em tih te bakah Lebanon-a Hezbollah thiltithei takte chuan indona an luhchilh zui ve mai ang em tih te chu hriatfiah theih loh thil ni mek a ni thung.