MSA-in vote chhiar hun ngenna a hlawhtlin ring

Election Commission of India-in Mizoram inthlanpui vote chhiar hun atana a ruat December 3 chu Pathianni a nih avanga sawn tura an ngenna chu a hlawhtlin ngei an ring tih Mizoram Secular Alliance (MSA) chuan an sawi.
MSA thupuangtu John Siamkunga chuan India rama sakhaw zalenna tihchhiata awm leh sakhaw zalenna paih tuma hma lakna awm mek do tlang turin Congress party, PC party leh ZNP an thawkho tih a sawi a. MNF leh ZPM pawh thawhho puiah an sawm laiin, vawiin thlengin chhanna an hmuh loh bakah thudik lo thehdarhin tan an khawh zawk tih a sawi.
MNF chu NDA member nghet tak leh NEDA member ruh tak a ni a, Parliament-ah pawh rorel lai BJP lama thu an ni tih a sawi. ZPM chu Kristianna humhim tura theihtawp chhuah duh tura an rin laiin, BJP thawhpui loh chu an hlau hle tih ZPM leader thusawi hrang hrangah leh Secular Alliance lam a beih daih danah a chianga an ngaih thu a sawi.
ZPM leader chu Congress party beih a tumnaah thu dik lo, an sawrkar hun lai ni lo puia sawrkar anga sawiah leh, thil thlen hun a sawi pawh sawisualah a puh bawk.
MLA inthlan tur chu sakhaw zalenna duhtu leh Hindu lalram din duhtute inbeihna a ni dawn tih John Siamkunga hian sawiin, Congress party chu Kristian mai ni lo, sakhaw hrang hrang tan pawh thiantha nih tling leh sakhaw zalenna humhim tum tlattu a ni tih a sawi. BJP chuan rorelna in sang berah MP a ngah a, sakhaw zalenna chu a paih thei reng tawh tih sawiin, “BJP duh dan tantu state sawrkar 11 chiah an la nei a, pathum an la mamawh belh a, kumin MP inthlan hmaa neih ngei an tum a ni,” a ti a. BJP leh a thurualpui theihte sawrkarna lak belh tir loh a tul tih a sawi a ni.
Sakhaw zalenna kan neih zel theih nan Congress leh a thawhpuite vote tling hram turin mipui an ngen tih a sawi bawk.