Nupa karah sum chungchang

Nupa inhauhna tam tak hi sum chungchanga inhriatthiam lohna leh inhmuhthiam lohna a ni duh khawp mai a, nupa inthenna hial te pawh thlen thei a ni.
Sum chungchanga inhmuhthiam lohna hian a nghawng na thei hle a, sum chungchanga nupa kara rinawm lohna, eng emaw chhep relh lo neih te hi mipat hmeichhiatnaa inrinawm loh san aiin a nghawng a na zawk a, inngaihdam leh a harsa zawk niin marriage counsellor te chuan an sawi.
Psychotherapist Dr Vinod Goyal chuan a hnen pantu nupa tuak 10 zelah tuak 4 te chuan sum chungchangah inhmuhthiam lohna an nei niin a sawi a, “Sum hman dan leh thawhchhuah leh khawl dan turah nupa chuan ruahmanna fel tak an nei tur a ni a, ruahmanna fel an neih loh chuan sum chungchangah awlsam tea inhmuhthiam loh theih a ni a, chumi nghawng chu a na hle a ni,” a ti.
Dr Goyal chuan, “Nupa inkarah pawisa hmanchhuah dan tura thutlukna siamtu zawk an awm chuan a fuh lova, nupa chuan pawisa hman dan turah thuneihna thuhmun an nei tur a ni. Chutiang ni lova, nuin chawhmeh bazar-na turah pawh pa ber remtihna a lak hmasak a, khawi lai dawr ami nge a lei dawn tih nen lama midang a ngaihchan zel a tul chuan a fuh lovang,” a ti.
Dr Goyal-a’n nupa inkara sum chungchanga buaina a awm loh nana tih tur nia a sawi te kan rawn tarlang e:
1. Nupaa insiam hmain sum enkawl dan tur chungchang sawi dun tur a ni.
2. Leiba ngah tak chunga nupui pasal inneih loh tur a ni. Inneih hmaa leiba neih a, inneih hnua rulh leh ngai tur chi chuan nupa inkarah harsatna a thlen thuai thin.
3. A hlawh hnem zawkin ‘Ka hlawh tam zawk’ tiin a chapo puiin a inchhung bik tur a ni lo. Chutiang boruak a awm chuan a hlawh tlem zawkin inthlahrunna a nei thuai a, chu chuan boruak tha lo a siam mai thin.
4. Hlawh zat khaikhin thin loh tur a ni a, a hlawh tlem zawk an awm a nih pawhin inthlahrun phah nan hman tur a ni lo. Mahni hlawh hlawh kawl, ti a, mahni hlawh ve ve rin te a tih chi loh. Nupa hlawh chu chhunkhawm a, a hman dan tur pawh nupaa rel dun thin tur a ni.