Scientist-te chawlh hun pawhsei tum mek

Ministry of Science and Technology (MoST) chuan scientist-te retirement kum chu 65 ah tihsan an tum a, rawtna siam mek a ni.
Hetiang hmalakna an kalpuina chhan hi universities leh Indian Institutes of technology-ah te senior scientists te retirement age chu kum 65 a nih vang niin top scientist tena an pan zel vang tia sawi a ni.
Tun dinhmunah wing tin deuh thaw a scientist-te retirement age chu kum 60 a ni a, Indian Council of Agricultural Research (ICAR) leh Indian Council of Medical Research (ICMR) a thawkte erawh kum 62 a ni thung.
MoST in October 6 a note an siamah chuan ‘Science departments/Ministries a sientist te retirement age tihsan tumna chu kalpui mek a ni’ tiin tarlan a ni a. He note hi Department of Science and Technology (DST) huaia awm autonomous body 14 te hnenah thawn a ni a. Head of institution tinte chu an AB (autonomous bodies) theuha scientist-te zawm zat sawi turin leh November 2023 atanga March 2028 inkara scientist chawl tawh tur zatte hrilh turin a ti bawk.
Abhay Karandikar, October 3 a Ministry-a Secretary nihna chelh tan chuan engmah a hriat loh thu a sawi thung a. MoST hnuaiah hian Department of Biotechnology (DBT) a awm bawk a ni.
MoST te chuan tuna rawtna hi DBT atanga chhuak a nih thu sawiin kum tam tak chhung chu senior scientist rual te retirement age hnaih tawhte chuan academia a careers tha zawk neih duhin an chhuahsan thin tiin sawi a ni bawk a.
“He thilin a tum chu intluktlanna a ni a. Eng vangin nge Ministry a inziaklut scientist te dinhmun a chhiat bik ang le? Mahse, thil a la hma em a, sawihona la neiha rawtna la kal chauh a ni” tiin seior scientist pakhat Ministry of Earth Sciences (MoES) hnuaia thawk chuan a sawi thung a.
Tun hi sorkarin scientist-te retirement age tihsan nana hmalakna a kalpui tumkhatna a ni lo. Kum 2015 khan draft Cabinet note-ah chuan sorkar hnuaia research scinetist hrang hrangte chu hlawh inanga herrem tumna a lo nei tawh a.
Tun dinhmunah chuan ministry hnuaiah scientist chawlh hnaih tawh te chu kum hnih atanga kum nga vel an pawhseisak tlangpui a. Modi sorkar hian chutianga an lo kalpui thin chu a chhawk hmak tia sawiin senior employees te chelh chhunzawm nan short-term contract a pe zawk an ti bawk.