Box office-ah ‘Taylor Swift: The Eras Tour’ a No.1
Box office-ah ‘Taylor Swift: The Eras Tour’ a No.1
Taylor Swift concert movie ‘Taylor Swift: The Eras Tour’ chuan tun weekend kalta khan North America-ah cinema hall ticket hralhna atangin dollar maktaduai 97 a la lut a, box office No.1 a ni a, North America-ah chuan concert film tlangzarh tawh zinga sum la lut hnem ber a ni nghal der tawh a, kum hrang hrang lakah pawh October thla bika film tlangzarhah chuan opening weekend a sum lak luh tamah pahnihna a ni pha bawk.
Taylor Swift: The Eras Tour hian opening weekend-ah cinema hall ticket hralhna atangin US-ah dollar maktaduai 100 chu la lut tling thei turin an beisei a, mahse, hei hi pha lo hretin, dollar maktaduai 97 a la lut thei a, hei hi box office-ah a No.1 pui tho a ni.
US pawnlamah pawh a che tha thawkhat a, dollar maktaduai 33 la lut theiin, tihian khawvel huapa opening weekend-a a lak luh chu dollar maktaduai 130 a tling ta a ni. He concert film hi concert film tihchhuah tawh zawng zawngah opening weekend-a sum la lut tam ber a la ni a, opening weekend-a dollar maktaduai 74.3 lalut thei, Michael Jackson ‘This Is It’ pawh a khum a ni.
‘Taylor Swift: The Eras Tour’ movie ticket hi a leitu 82% chu hmeichhia an ni a, chung hmeichhe zinga 63% chu kum 18 leh 34 inkar an ni a, a tam ber chu kum 25 leh 34 inkar niin, anni hi 32% an tling a, tleirawl, kum 20 hnuailam pawh 17% an tling pha a ni.
Eras Tour concert movie hi an tlangzarh hma chuan 2011-a tlangzarh Justin Bieber: Never Say Never kha concert film-a sum la lut hnem ber niin, dollar maktaduai 73 a la lut thei a, US pawnah dollar maktaduai 26 la lut bawkin, opening weekend-a a lak luh zawng zawng chu dollar maktaduai 99 a tling, he record hi Eras Tour movie hian a rawn lehthal ta a ni.
Michael Jackson ‘This Is It’ kha a thih hnuah, 2009 khan tlangzarh niin, North America-ah dollar maktaduai 72.1 la lut theiin, US pawna a lak luh nen chuan dollar maktaduai 181.9 a tlin thei a, mahse, he movie hi concert lai tak tak film ni lovin, documentary leh rehearsal a nei lai vel tarlan a ni a, concert film anga chhiar a ni ta lo a ni.
Kar kalta box office No.1 ‘The Exorcist: Believer’-in a weekend vawi hnihnaah dollar maktaduai 11 la lut lehin No.2-ah a tawlh a, he film hian ni 10 chhungin US-ah dollar maktaduai 44.9 a la lut tling ta.
Paw Patrol: The Mighty Movie pawhin an tlangzarh atanga weekend vawi thumnaah dollar maktaduai 7 la lut lehin No.3 a la ni a, tihian kar thum chhungin US-ah dollar maktaduai 49.9 la lut tling tawhin, US pawna a lak luh nen chuan dollar maktaduai 126.3 a tlin ve ta bawk.
‘Saw X’ pawhin dollar maktaduai 5.7 la lut lehin No.4 a ni a, he film hian kar thum chhungin US-ah dollar maktaduai 41.1 la lut tawhin, US pawna a lak luh nen chuan dollar maktaduai 85 a tlin ve tawh bawk.
The Creator pawhin a kar thumnaah dollar maktaduai 4.3 la lut lehin No.5 a ni a, kar thum chhungin US-ah dollar maktaduai 32.4 la lut tawhin, US pawna a lak luh nen chuan dollar maktaduai 89.1 a tlin ve tawh bawk.