Israel leh Hamas te inbeihna zual zel

Israel leh Hamas-te inbeihna kal lai mek zelah Israel chuan Gaza khawpui-a Al-Ahli Arab Hospital chu beiin mi 500 lai maiin nunna an chan thu Palestinian thuneitute chuan an sawi a ni.
Hetih mek lai hian US President Joe Biden chuan Israel leh Hamas te inbeih mekna tihtawp dan tur kawng zawnga Netanyahu nena inbe turin nimin ni 18.10.2023 khan Israel ram a thleng ve bawk. Khawvel ram hruaitu tam tak chuan Thawhlehni-a Al-Ahli Arab Hospital beih vak a nih avang khan remna kawng zawnga inbiak a harsat sawt an rin thu an sawi ve mek bawk a ni.
Al-Ahli Arab Hospital hi Israel ten Gaza khawpui an beih avanga hliam tuar chi hrang hrangte enkawlna hmun tura ruahman a ni a, amaherawhchu he hospital beih chungchangah hian Israel chuan an tih a nih loh thu leh Islamic Jihad hel hoin Israel kah an tumna lama rocket kal sualin he hospital hi a deng fuh ta nia an rin thu an sawi ve bawk a ni.
Biden-a’n nimina Israel ram a tlawh hi Israel-in Al-Ahli Arab hospital a beih hma atanga ruahmanna lo awm tawh niin sawi a ni a, hei hian Israel ten Hamas an beihna kawngah nasa zawka tha an thawhna ti hluartuah ngaih a ni bawk a ni. Israel ten Gaza hospital an beih avang hian Biden-an helai ram vela palai hna a thawh tum chu a ni lo zawngin a nghawng ve leh thung a.
Jordan ram chuan an Lal King Abdullah II telin Egyptian President Abdel Fattah el-Sisi te, Palestinian Authority President Mahmoud Abbas te nena Jordan khawpui Amman-a meeting an lo tum lawk tawh chu an thulh phah ta a ni. Biden chuan a Twitter kaltlangin Al-Ahli Arab Hospital beih a ni chu pawi a tih thu leh a tih thlabar thu lo sawi tawhin “Nunrawng thil tih leh chhungril taka a tih lungngaih” thu te a lo sawi tawh a, mahse Israel te insawithiamna chu direct takin a hnial duh lem lo a ni.
Israel mi Hamas ten an hren beh mek chungchang chu Netanyahu nen an sawi dun a. Biden chuan Hamas hel ten an thah tak chhungte leh a lo bei lettu Israel mite nen tha taka an thawhho tur thu a sawi a. He sawihona hian Israel President leh chhanchhuah hna thawktute pawh a huamin him taka Hamas helte hren behna hnuai atanga an lo chhuah theih dan kawng an zawn tur thu a sawi bawk a ni.
US President Joe Biden-an Israel a tlawh avang hian he indona kal zel tur hi a ti ziaawm ang em, tih chu ngaihven hlawh berte zing ami a ni ta a. US Secretary of State Blinken chuan Biden leh Netanyahu ten darkar 7 lai inkawmna an neih ah Netanyahu chuan Gaza khawpuia mihring chengte tanpui dan tur ruahmanna a neih thu a sawi a ni. Gaza khawpuia cheng mihring maktaduai 2.3 vel te ni tin mamawh lakna tur hi Israel hian a lo dang chat vek tawh a ni.