Hnamdang pasal nei candidate luih vangin kawng zawh dawn

MLA inthlanpuia political party-ten an official candidate atan hnamdang kawppui neite dah lo tura Mizo Zirlai Pawl-in a ngenna zawm famkim a nih loh avangin vawiin – October 20 hian Aizawlah ‘Hnam humhimna kawngzawh’ neih a ni dawn.MZP Gen. Hqrs. thuchhuak chuan 2022 December 19 khan political party tinte chu hnamdang pasal nei candidate-a dahlo turin ziakin an ngen a. Kumin August 21 khan party tinte hi ngenna a thawn nawn a, party hotute pawh an hmu bawk tih a sawi.
MZP ngenna ngaipawimawha hnamdang pasal nei candidate-a dahlo party-te chungah lawmthu a sawi rualin, an ngenna zah zo loin Indian National Congress (INC) chuan Lunglei South Assembly constituency-ah hnamdang pasal nei a dah tih a sawi. INC ticket-a Lunglei South biala ding tur Meriam L. Hrangchal chu a pasala pa leh a nu chu hnamdang niin a sawi.
Mizo hnam dan, Mizoram sawrkar Law & Judicial department tihchhuah, “The Mizo Customary Law” bung 3:74-naah “… Mizo hmeichhiain hnamdang pasal a neih chuan hnamdang chhungkuaah a luta ngaih a ni,” a tih chu, MZP chuan Mizo hmeichhia hnamdang neite chu hnamdang chhungkuaah a ngai nghet tlat tih sawiin, ‘Mizo mipui aiawha ram rorelna sang bera thu turin kan pawm thei lo a. Mizo nihna hi Mizorama awm rei tawh avanga inpek chi ah MZP chuan a ngai loa, Mizo hnam hi thisenah zawk a ni,’ a ti.
Mizo hnam damna turin hetianga hnamdang pasal nei in-candidate chu hnawl a, vote lo turin mipui a ngen tih MZP hian sawiin, hetiang mi candidate-a dahtu Congress party pawh a dem takzet tih a sawi.
BJP-in hnukkir
MLA inthlanpui neih tura MZP-in hnamdang pasal nei candidate lo tura an ngenna ngaipawimawhin BJP chuan Tuivawl biala an candidate chu an hnukkir tih October 19 zan khan an puang.