Ni 40 dawn hnuah Covid-19 hri vei awm leh

Covid-19 hrileng a zia a, hun engemaw chen chu Mizoramah hri vei
hriatchhuah an awm lo tawh. Mahse Ningani zana result chhuakah hri vei pakhat a awm a, ni 36 hnuah hri vei an awm leh.
October ni 19 zan dar 11-a result chhuakah sample pahnih endik a nih thu leh pakhat chu hri vei a lo nih thu te a lang a, September ni 12 hnua hri vei an awm leh hmasak ber a ni.
IDSP te’n an chhinchhiah danin, October ni 13-ah sample pakhat endik (test) a ni a, mahse hri a kai lo tih finfiah a ni. Chumi hnuah rinhlelh thila sample endik tur a awm zui lo a, ni 19-ah endik tur pahnih a awm leh ta a ni.
September ni 12-a hri vei hriatchhuah kha ni 18-ah dam takin a chhuak a, chumi hnu October ni 18 thleng chu Mizoramah hri vanga enkawl ngai an awm lo. September ni 6-ah pakhat hriatchhuah a awm bawk.
Kuminah April velah khan hri vei an awm leh a, May-ah a hluar; May thlaah hian hri vei hriatchhuah mi 375 an awm a, June-ah tlahniamin, mi 116-in an vei tih hriatchhuah a ni. July-ah mi 12-in an vei a, vanneihthlak takin hri vei zat hi a tlahniam ta zel a ni.
Vanneihthlak takin hri vanga nunna chan pawh thla thum chuang an awm tawh lo; June ni 22 hnu-ah Mizoramah Covid-19 vanga nunna chan an awm rih lo.
Hnahthial, Lawngtlai, Mamit leh Siaha district-ahte chuan kuminah hri vei hriatchhuah an awm rih lo.
IDSP te’n an chhinchhiah danin, Mizoramah mi 239562-in hri an vei tawh a, vanduaithlak takin mi 734-in hri vangin nunna an chan tawh.