Candidate 174-in endik paltlang Inhnukdawk duh tan hun ala awm

November 7-a MLA inthlanpui neih turah mi 174-in nomination paper an thehlut a, an vai hian endikna paltlangin chhawk ngai an awm lo. Vawiin, October 23 chawhnu dar 3.00 thleng inhnuhdawh theih hun hawn a ni.Inrinni khan returning officer tinten an huamchhunga nomination paper an endik a. Nomination thehlut mi 174 zinga 173 chuan tha takin endikna an paltlang laiin, Lawngtlai East-a ZPM candidate tura hming pe Dr Lorrain Lalpekliana Chinzah nomination paper-a proposer 10 awm tur zinga pakhatin hming a lo sign loa, scrutiny neih laiin thutawp siam theih a ni lo. Pathianni khan Lawngtlai East biala hming pekluh bik hi endik nawn niin, Dr Lorrain pawh hian tha takin endikna hi a paltlang ve leh a ni.
Hming pelut 174 zingah hmeichhia 16 an awm a. Inthlanpui hnuhnung ber, 2018 inthlan aiin pahnihin hmeichhe candidate an tlem zawk. Hmeichhe candidate 16 zingah MNF, INC leh ZPM ten pahnih theuh an thawh a; BJP-in pathum neiin, independent-a ding tur Zoram Thar-in candidate 5 an nei a, independent-a ding tur midang 2 an awm a ni.
Political party zingah MNF, INC leh ZPM ten bial awm zawng zawng bial 40 an chuh dawn a. BJP-in bial 23, AAP-in bial 4 a ni. Zoram Thar (Lalpa Chhiahhlawhte) chuan independent-in bial 18 an chuh dawn a, ‘Zo Re-Unification Movement’ tia invuah tunhnaia pawl din thar chuan independent-in pakhat an chuh dawn. Pawl behchhan nei lo independent-a din tum mi 8 an awm bawk.

Candidate hausa leh hausa lo:

Nomination thehlut mi 174 zingah an affidavit atanga a lan danin, Champhai North Assembly biala ZPM candidate tur H Ginzalal chu a hausa ber a, a ni hian khawih chet theih, ‘moveable assets’ (sumfai, lirthei, rangkachak/tlereuh adt) cheng vaibelchhe 16.73 hu leh khawih chet theih loh ‘immoveable assets’ (ram, in adt) cheng vbch 18.60 hu neiin, belhkhawmin a hausakna hi vbch. 35.33 hu a ni.
Serchhip biala independent-a ding tur Ramhlun Edena chu sumfai leh ro lam nei tlem ber a ni a. Nomination paper a thehluh laia a dinhmun chu, a vaiin Rs.1000 a nei a, a bak thildang a nei lo. Rs. 500 hi bank-ah a dah a, a kutah Rs.500 a kawl a ni.