US rorel khawl member thahah vau
Israel leh Hamas-te indona kal zelah US-a democratic Congress member Muslim sakhaw zuitu Ilhan Omar chuan Zirtawpni kalta khan tihhlum tura vauna a dawn thu leh an chhungkaw himna atan a hlauhawm hle thu a sawi chhuak.
Minnesota atanga Democratic aiawha Congress hmeichhe nu hian Hamas ten Israel an beih thut chu a lo sawisel tawh a, hemi avang hian thah tura vau leh hual mek (target) a nih thu sawi a ni.
He thu a sawi atang hian Omar hian vauna hrang hrang voicemails atang tein a dawng nasa hle a – phatsantu, hel, thi chungin paih i ni ang, mi tuin emaw an that che anga meidilah paih i ni ang, man i ni anga tura hrai hlum i ni ang, ti tein vauna a dawn nasat thu a sawi a ni.
“Kei leh ka chhungte nunna atan hian a hlauhawm em em a, chutiang bawkin an tawngkam bawlhhlawh tak tak te chu ka staff te tan pawh hnathawh tibuai thei khawp hial an ni,” tiin Omar chuan a sawi a ni. ”
A pawimawh berah chuan America rama Muslim mi maktaduaih tamtak te a rikrap a ni,” tiin a sawi bawk.
NBC news-a voicemails hmanga thu thawnah chuan Omar chu “Muslim hel” leh “Phiarrutu” ti tein an vuah a, group thenkhat chuan amah leh a fate that tura an veh reng thu an sawi a ni.
Omar vautute zinga pathumna chuan hel pawla awm thu a sawi a, “Kan pawlin kan hmuh hun ni tur che leh buara bag-a kan khung hun tur te leh i lu kan tan hun tur hi ka nghak thei tawh lo a ni. Israel mite hian nangmah chawpin an la thah vek che u ka beisei” tiin a sawi a ni.
Congress woman Omar chuan amah leh Muslim American tamtak te chu Hamas-in Israel a beih thut duhlohna an sawi avanga a tuartu an nih thu a sawi a.
Omar chuan, “Office ka luah atang hian thah tuma vauna mi pahnih atanga ka dawn tawh avangin thiam loh chantir an ni tawh a. Hei hi thil vang tak a ni. Ka fate tan ka hlau em em a, in hriat loh lam atangin hlauhawm a awm thut theih avanga inveng reng turin ka hrilh thin,” tiin a sawi a ni.
Heng bakah hian October ni 7 atang khan Muslim te laka hleilenna hi a thleng reng a ni tiin a sawi bawk.
Mipa naupang kum 6 mi Palestinian American chu an in luahna neituin vawi 26 a vih hnuah a thi ni a sawi a ni a, hemi bakah New York khawpuiah Sikh Pa chu mi pakhat in a lukhum hlip tura tiin sawisak a ni bawk a.
Jewish pawl te chuan anmahni duhlohna avangin vauna an tawh nasat thu an sawi ve bawk a ni. October ni 7 atangin Palestine mi 3,400 aia tam thah an nih tawh thu report a ni.
The Anti Defamation League an tih pawl te hmuh danin a tlem ber ah Jewish te duhloh lantirna hi vawi 141 vel October 7 leh 17 chhung hian thleng angin an hria a, hemi hun chhung nikum nena khaikhinin za zela 48 velin a pung a ni.