India chet danah khawvelin mak ti – Justin Trudeau

Canada Prime Minister Justin Trudeau chuan India rama a palai hnathawk mi 41 India-in a hnawhchhuah chungchangah, ram leh ram inpalai tawnna dan bulpui chu India-in a hnawl niin a sawi.
Zirtawpni kaltaa India laka a lungawilohna chu sawiin Trudeau chuan India hian Vienna Convention-a dan leh dun te a bawhchhia a ni tiin khawvel ram hrang hrangte chu India chet danah hian kan lungawi tur a ni lo a ti a ni.
Trudeau chuan an buaina chhan ber Khalistan hel Hardeep Singh Nijjar thah a nih dan chungchang pawh a sawi chhuak bawk. New Delhi hian India leh Canada rama mipui maktaduai tamtak te dan pangaia thlamuang taka an khawsak leh mai theih hi rin a harsa hle a ni a ti bawk.
Justin Trudeau chuan, “Kar kaltaa India sorkar chet dan kha International law bawhchhiatna a ni a, sir khat chauh ngaihtuahin India-a Canada palai 40 te hi a hnawt chhuak a ni.
Hei hi ram leh ram inpalai tawnna chungchanga Vienna Convention bawhchhiatna a ni. He thil avang hian khawvel ramte chu India chet danah an lungngai tur a ni a, India chet dan hi Internatioanal Law bawhchhiatna niin Canada ram leilung ngeia Canada mi thahna chungchanga India inhnamhnawih dan lak pen tumna a ni,” tiin Brampton hmunah sawi a ni.
India-in Canada chu a ram chhung thila inrawlh buaiah puhin Canada sorkar palai leh a hnathawk mi 41 chu inthiar chhuak turin a lo ti tawh a. New Delhi erawh chuan Canada sorkar palai hnawhchhuah te hi India leh Canada-a ram pahnihte hnathawktu (Staff) inzat tlanga an awm a duh vang mai a nih thu a sawi ve thung a ni. Ministry of External Affairs chuan Zirtawpni kal ta khan thuchhuah siamin, Canada-in International Law bawhchhiaa India a puhna chu dawt mai a nih thu a sawi ve bawk a ni.
“Ram pahnihte kan inlaichinna leh kan inpalai tawnnaah hian Canada hian a hnathawkte India-ah a nei tam fal bik hle a, hei hian India ram inrelbawlnaah Canada chu a inrawlh thukin ram pahnihte inpalai tawnnaa hnathawkte inzat ve vea awm turin min nawr ta a ni,” a ti bawk.
Canada Foreign Affairs Minister Melanie Joly chuan, “He kan buaina hi Canadian palaite hnawhchhuah an ni tih bak chuan thil dang chhuanlam hmanga kawihher kan tum lo,” tiin a sawi ve bawk a ni. India chuan a chet dan hi ram pahnih hnathawktu zat te inang tlanga siam a tum nia sawiin Vienna Convention Article 11.1 zulzui-a ti a nih thu a sawi ve thung a.
He article sawi dan chuan, “Ram pahnihte inpalai tawnna chungchangah hnathawktu zat tur inremsiamna mumal tak a awm loh chuan a lo dawngtu ram chuan an mamawh dan azirin hnathawktu zat chu a bithliah thei anga, inremsiamna leh a tul dan ang zelin a lo dawngtu ram ten ruahmanna an siam zel thei ang,” tiin. Hetih mek lai hian US leh UK te chuan India atanga Canada palai hnawhchhuahte lam tan zawngin thu a sawi ve leh bawk a. US State Department spokesperson Matthew Miller chuan, “India atanga Canada palai hnawhchhuah an nih chungchanga India-in a ram chhunga Canada palai tih tlem a duh chhan hi US chuan a ngai thutak hle a ni”, tiin a sawi a. “India sorkar-in Canada palaite hnawtchhuak mai tur khawpa thutlukna a siam ta mai hi kan pawmpui thei lo a ni”, tiin British Foreign Office thupuangtu chuan a sawi ve bawk.