Eiruk tum reng reng lo hlir candidate kan nei – MNF

MLA inthlan atana an party candidate-te chu eiru lo tura intiam ngai ve loin, eiruk tum reng reng lo vek an ni tih MNF chuan an sawi.
MNF Gen. Hqrs. thuchhuak chuan November 7-a Assembly inthlan awm turah MNF chuan rampum huapin kiltinah hma a la zel a. Thlanchhuah ni tura MNF candidate-te an tha tlangin mipui ngaihzawn an hlawh hlawm hle nia an hria avangin an lawm hle tih a sawi.
An candidate-te chu kohhran upa ni mek 12, PhD (doctorate degree nei) 5, medical doctor 1, engineer degree nei 4 leh rampum huap tlawmngai pawla hruaitu hlun lo ni tawh engemawzat an ni, tiin, ‘Sawrkar tha leh chak din tura rinngam thiau, eiru lo tura intiam ve ngai lo, eiruk tum reng reng lo vek an ni. Pathian leh mipui duhsakna changin sawrkar leh ngei beiseina sang tak kan nei a ni,’ a ti.
Tun term kal mekah Mizoram chuah ni lo, India leh khawvel pum huap harsatna in min tlakbuak bakah Mizoram phei chuan kum danga a tawh ngai loh ran hrileng leh buaina dang a tawk nasa a, heng harsatna kara sawrkarna chang an ni tih leh, kohhran leh tlawmngai pawl nen theihtawp chhuahin Pathian au chunga paltlang an ni tih Zoram mipuiin an hria a, hemi karah hmasawnna tam tak kiltina hmuh theih awm pawh an hmuh hmaih lo tih sawiin, ‘Hun ralmuangah hmasawnna nasa zawk leh kan hnam leh sakhua humhim zela thawk tur hian mipuiin MNF sawrkar hi ringtawkin, duhsakna an hlan ngei kan ring tlat a ni,’ a ti.
Campaign rusum thlakin kiltinah MNF chuan hma la in, bial tinah MNF sawrkar leh duha rinna nghattu an pung zel tih MNF thuchhuah hian a sawi a. ZPM, Congress, BJP kalsan a, MNF huangchhunga ram rawngbawl hna thawk tur hian hmun ruak a la awm a, neutral atanga tha thawh duha penlut duh tan pawh zau takin an inhawng reng tih a sawi. Kalphung nghet tha tak neiin, zuanglawr ve loin, Mizo nationalism tluanghrui vuanin chak takin a kal zel dawn tih a sawi a ni.