Hamas ten Israel hmeichhe pahnih chhuah zalen

Hamas hel pawl te chuan October ni 7-a Israel an beihna atanga an man mi 200 chuang an mante zingah nimin thawhlehni khan hmeichhe pahnih chu an chhuah zalen ta a, hetih lai hian report thenkhatin a tarlan danin US chuan lei lam atanga Gaza Strip a beihna te titawp rih turin a ngen a ni.
Telegram kaltlanga thu sawiin Palestinian Hamas hel pawla thupuangtu Abu Ubaida chuan, “An hriselna that tawk loh avang leh enkawl an ngaih nasat avangin chhuah mai kan remti ta a ni,” tiin an mi hren an chhuah tak te chungchang a sawi a ni.
Israel Prime Minister Office chuan hmeichhia an chhuah te hi a dik ngei a ni tih puangin Nurit Cooper, kum 79-a upa leh Yocheved Lifshitz, kum 85 te niin Israel sipai te kutah hlan niin damdawi hmanga enkawl tura lak nghal an nih thu an sawi ve nghal bawk. Israel-in Gaza hmuna Hamas helte thlawhna atanga a beihnaah hian mi 5,000 chuang thi tawh angin Gaza health ministry chuan a sawi a ni.
World Bank President chuan Saudi Arabia-a investor conference an neih mekah thu sawiin Israel leh Hamas-te indona hian khawvel ram hmasawn zelna tur nasa takin a tichhia a ni, a ti.
“Ni rei lo te kal ta maia Israel leh Hamas te Gaza-a an inbeihna hi ni tin mai hian han chhut khawm ta ila ram hmasawnna atan hian a nghawng hi a nasa tulh tulh a. Tunah hian dinhmun hlauhawm takah kan ding mek a ni,” tiin Ajay Banga chuan a sawi a ni.
Israel Securities Authority (ISA) te chuan October 7-a Israel chhim lam nasa tak maia beih an nihna a inhnamhnawih ngei Hamas hel te zing ami inpuanna video clip chu thawhtanni zing khan a ti chhuak a.
ISA Communications ten he video clip an tih chhuahah hian Hamas hel an man te hnen atanga an thu zawh leh an inpuanna chiang takin a tarlang tih thuneitute chuan an sawi a ni.
Video-ah chuan Hamas hel te thusawi-Israel civil mite Gaza-a hren beh tura kan man theih chuan lawmman tha tak pek min tiam’ tih thu an sawi te chu chiang taka a hriat theih thu an sawi a ni. “Mi tupawh Gaza-a hren beh tura man an nih chuan lawmmanah USD 10,000 leh chenna hmun tha tak pek an nih tur thu” Hamas hel an man te hian video-ah an sawi a ni.
Gaza hmuna Hamas hel sorkar chuan thawhlehni khan Israel ten boruak atanga zan lama an rawn beihnaah khan mi 140 an thih thu an sawi a ni. Sorkar thuthar thehdarhtute chuan, “Mipui 140 chuang an thi a, mi za tam takin Israel te beihpui thlaknaah hliam an tuar bawk a ni,” tiin a sawi a ni.
Gaza-a roreltu te chuan October ni 7-a Israel beih a nih atang khan Gaza ram chhungah mi 5,000 chuangin nunna an chan tawh a, sipai ten silai hmanga an beihnaah mi 1,400 laiin nunna an chan tawh tih an sawi.