Hamas Militant ten Jews 10 thah chapo pui

Israel Defense Ministry chuan chuan Hamas hel atanga audio record an neih chu tlangzarhin Hamas helin a nu leh pa te a phone lai leh Jews mi 10 a thah takte chu chapo pui takin a nu leh pa te a hrilh a ni. He audio clip hi Israel Foreign Minister Eli Cohen-an United Nations Security Council-ah a lo play tawh a ni. Hamas hel ten October 7 khan Israel an bei thut a pawisawilo mi sang tam takin an thih phah tawh a ni.
Hetihlai hian khawvela thuneitu sang ber ber te chuan indona hmun Gaza-a mipui te tanpui dan tur an buaipui nasa em em a. United Nation chief Antonio Guterres chuan indona hian international law a bawhchhia a ni tiin inkahhai puang turin a nawr ve mek bawk a ni.
Hetih mek laiin Hamas member pakhat-in Gaza ramri bul Mefalism an tih hmun atangin a nu leh pa te a phone call-in a bia a, amah chauha Jews mi 10 a thah theih thu hrilhin a nu leh pa te pawhin an lo fak thu hriat a ni a, he audio clip neitu tak hi hriat chian theih a ni lo a ni.
The Coordination of Government Activities in the Territories (COGAT)-in Thawhlehni a Tweet hmanga a sawi danin, “Setana aw a ni. Hamas helin JEWS 10 a that a, chapo takin an in lam a phone. He a phone call-na hi a mi thah te zing ami ta a ni. A aw atanga a intihtheih zia hi ngaithla ve teh u. A nu leh pa te chapo zia pawh hi” tiin audio clip atanga an aw ngaihthlak an sawi a ni.
UN Chief chuan UN Security Council member-15 te hnenah thawhlehni khan thu sawiin mipui pawisawilo te venghim turin a ngen a ni. “Hamas ten Israel an beihna hi engmah awmlohna leh hmun ruak a nilo tih hi kan pawm a ngai a. Palestine mipuite pawh hian kum 56 meuh thawipik tak chungin ei an zawng a ni” tiin Guterres chuan a sawi a ni.
Guterres thusawi hian Israel chu a tithinrim hle a. Israel ambassador to the United Nations, Gilad Erdan chuan UN Secretary General Antonio Guterres chu bang turin a ti a ni. Gilad Erdan chuan Guterres chu rawlrala chetna leh tualthahna chu hrethiamlo-a sawiah a puh a ni. Israel, US, German leh EU te chuan Hamas hi hel pawlah a ngai a.
Israel Ambassador Erdan chuan social media platform X-ah Guterres thusawi awmzia atangin “UN kaihruai turin a tling tawklo” a ti hial a ni. Guterres thusawi hian Israel Foreign Minister Eli Cohen pawh a ti thinrim hle a, Guterres chu kawk meuhin ring taka auin October 7-a Hamas ten an beih khan mipui pawisawilo engzatin nge tuara naupang engzat nge thi chhiar rawh.
Cohen chuan, “Mr. Secretary General, eng khawvelah nge i chen? Chiang takin he kan chenna khawvel hi kan ta a nilo a ni” tiin a sawi a. Cohen hian Israel leh Hamas te intihbuai hnu-a Guterres nen inhmuh an tum chu a thulh a ni. “UN Secretary General hi ka hmu lovang. October 7 hnu ah ngaihdan thuhmun sawi turin inhmuhna tur hmun kan neilo. Hamas te hi he planet atanga lang leh tawhlo turin kan nuaibo vek tur a ni” tiin Cohen chuan social media ah a ziak a ni.