Season kal laia El Clasico inkhel hmasaber thlir zan

Season kal laia El Clasico inkhel hmasaber thlir zan
Season thara a vawikhatna atan Spanish club ropui inhal leh inel, inhmelma kumhlun pahnih Barcelona leh Real Madrid chu zanin hian Nou Camp-ah an insu dawn a, tuntum Clasico hi La Liga match tur a ni.
Inrinni zan hi La Liga Clasico vawi 189-na tur niin, tun season-a an intawn vawikhatna herchhuah lai hi team pahnihin an khelh that ber hun an kalpui zawh loh lai ve ve a ni a, player pawimawh inhliam kawl an nei ve ve bawk.
League khelh 10 ve veah point 25 hum chungin Real Madrid-in table-ah hma an hruai a; point khata hniam chungin Barcelona-in pathumna an luah a, an inkarah point 25 ve bawk neitu Girona an tlazep.
History kan en pawhin El Clasico hnehtu nih hi Spain rama club inthlurbing pahnihta tan a pawimawh chungchuang hle a, title chang tur zawk hriltu em chu ni chiah lo mah se team pahnih inkara chungnung zawk leh ropui zawk nih inchuhna tawp thei loah Clasico hnehtu nihna hian thui takin kawngro a su lo thei lo a ni!
Real Madrid lam hian lei fuh em em England international Jude Bellingham an kawl a, ani hian tun season-ah club leh ram tan belhkhawma game 15 atangin goal 12 a thun tling tawh a, zanin Clasico-ah pawh goal bawh kawnga Bernabeu club innghahna pawimawh a nih leh ngei a rinawm.
Bellingham hian Thawhlehni Champions League-ah khan Portugal ramah goal khung lehin, kha kha Real tan match 12 akhelh tawha a goal 11-na a ni der tawh a, Real Madrid legend Zinedine Zidane nen pawi an khaikhin zuau zuau tawh!
Brazil mihang forward Vinicius Jr pawh zawi zawiin a rawn khel tha chho tan mek a, amaha thaber kha hmuh tur a awm chho leh tan thuak tawh a, mahse, goal lamah Bellingham chuan a la hliah hneh kher mai!
Right winger leh forward ni kawp Rodrygo pawhin Thawhlehnia Braga an hneh tum khan Champions League goal a thun a, kha kha season bul tan nia goal a thun hnua Real Madrid tana Brazilian goal khung lai kan hmuh leh vawikhatna niin, El Clasico boruak len chhoh laia an hmatawng pawimawhte’n Europe-a goal an han sualchhuak kha fans tan chuan lawm lohna chi a nih hmel loh!
Barcelona coach Xavi Hernandez chu hliam avangin a buai vanglai tak a ni a; zanin big game atan hian a player damchiang lote a risk ngam dawn em sawilawk theih a ni rih lo.
Nilaini Champions League-a Shakhtar Donetsk an hneh tum khan an goal thun khawl Robert Lewandowski hmel hmuh tawh fans lamin an beisei hman thuak thuak a, mahse, Inrinni zan Clasico atan hian a khek nia ngaihna a lian a, la damkawr angreng viau mah se zanin Nou Camp inkhel lianah hi chuan bench atang taka khelmual a luh tawh beiseina a lian leh mek a ni.
Frenkie de Jong leh Raphinha khelmual luh leh luh loh tur pawh a la chiang lo a, Pedri pawh kir hnai tawh tur zinga rinluh niin, Real Madrid game-ah hian hmu hman tawh ang i maw?
Regular player an chhawr theih loh thup avangin duthlan tur tlachham Xavi chuan academy atangin ei tling chho tan a dap kual a ngai a, rawlthar kum 17 mi Marc Guiu chuan tunhnai khan a La Liga debut nghakchhuakin, khelmual a luh atanga second 30-na lekah goal a khung nghe nghe a; tunkar Champions League-a Barca player khel tha ber Spaniard Fermin Lopez pawh kha kum 20 mi lek la niin, Europe-ah khan goal khat a thun bakah tum hnih ngawt goal ban a tihper a, he team-a young talent rawn inlar chho mek hi Barcelona fans tana beiseina thar siamsaktu a ni ngei ang.
La Masia atanga inzirchhuak Gavi leh Alejandro Balde, Ronald Araujo tih te, Lamine Yamal, Fermin leh Pedri tihte hian ei an tling chho tan a, zanin El Clasico-ah pawh an hmel hmuh beisei chhin leh phawt ang.
Barcelona hi season kal lai inelna hrang hranga la tlawm lo niin, vawi 10 an chak tawh bakah draw vawithum an nei tling tawh a; season liamtaa title an lakna kawngah khan an defende-in fak a hlawh a; tun season kal laiah erawh league game 10-ah goal 10 an chhuah a, season liamta ai chuan an tlarhnung a phui lo deuh dawn em ni tih a ngaihtuah theih a, mahse, tlawmna khawp goal erawh an la chhuah lo thung.
German goalkeeper Marc-Andre ter Stegen hi season liamta khan a tawh a khirh hle bawk a, mahse, ani pawh hi season tharah hian a zuai deuh em a tih theih bawk!