Inthlan thupui la awm tak tak lo

Mizoramin inthlanpui a hmachhawn mek a, politi
cal party-te tan buh lu chuh hun a ni. Party leh candidate-te’n theihtawp an chhuah mek a, mahse thupui tak tak a la awm lo tiin a sawi theih ang.
Hmun dang ang bawkin Mizoram inthlanah hian thupui, thu inchuh a awm thin a, remna leh muanna chungchang a nih tum te, sakhuana chungchang a nih tum te, kuthnathawktute chungchang a nih tum te a awm thin. Kuminah chuan chutianga han mal man chat tur a la awm lovah ngaih a ni.
Tun hnai inthlanah, 2008 inthlan dawn khan thalaite khawvel tih leh “change” tih te a lar a, political party-te’n thalaite khawvel din an intiam hlawm. “Change” tih tawngkam phei chu politician-te chauh ni lovin mipui pawhin an sawi a, tawngkam tualleng a tling a ni ber. 2018 inthlanah khan BJP leh Hindu sakhaw dodalna lam a ri nasa a, “Sashank, out” tih tawngkam a ri nasa; khatih laia Mizoram chief electoral officer SB Shashank nawr chhuah tumin tlawmngai pawlte hialin kawngzawh an huaihawt a, relief camp-a Tuikuk voter chungchang a ni. Kha kha BJP laka lungawi lohna nen a inzawm a, NEDA-a tel MNF-in an tuar viauvah ngaih a ni.
Kuminah hian kum hmasa lam angin thupui emaw thu inchuh emaw a awm lo a, political party te’n thil inang thap han zawrh an nei rih lo niin a lang.
Tuna a lan dan chuan, political party-te hi BJP hmangin an inbei ber a, BJP inhlauhsiak leh inhlatsiakna a awm bakah BJP thlawptu tia inbeihna a awm.
BJP hian sorkar-a tel an tum a, party dang nena sorkar intawm siam theih an inbeisei. Tun hnaiah tlahniamin an inhre lo a, Manipur buai an tuarna kha a reh tawhah an ngai. An president Vanlalhmuaka chuan Manipur buai tirhah khan an tuar a, mahse tunah chuan a reh tawh, a ti.