Sum tichingpentu cheng nuai za chawi leh kum 4 tang turin hrem
Law & Judicial Department hnuaia thawk an department sum, cheng vaibelchhe khat chuang tichingpentu chu court-in thiam loh a chantir a. Cheng nuai 100 chawi tur leh kum 4 jail tang turin a hrem. Sum chawi tur hi a pe thei lo a nih chuan kum 50 jail tan belhin a tlak a ngai thung.Law & Judicial department hnuaia sum chingpen nia hriatah he department under secretary hmingin Anti Corruption Bureau ah 2018 September 24 khan FIR thehluh a ni a. ACB chhuizuina atanga a lan danin, he department-a LDC (muster roll) a thawk Lydia Lalhruaitluangi (27) chuan sum hi a tichingpen nia hmuh a ni.
Kum 2012 atanga thawk tanin, 2013 September khan cashier pui turin bill assistant mawhphurhna pek a ni a, sum a tihchingpen hi 2015 December atanga intan nia hriat a ni. Department sumpai, a tam ber chu sawrkar ukil-te hlawh tur ‘professional services’ tih hnuai atangte in office bill lem, sanction order lem, a chunga thuneitu (under secretary etc) hming sign lem leh cash memo lem hmangin Rs. 1,06,90,916 a lo lachhuak hman a, ama bank account bakah a nu leh pa leh laizawnte account-ah dahlutin a mimal tan an account atang hian a lachhuak leh thin. Hei vang hian a chhungte pawh hi he thubuaiah hian rin luh tel ve an ni.
Thubuai ngaihtuahnaah hian thuhretute thusawi leh lehkha pawimawh buk a nih hnu ah a ngaihtuahtu Prevention of Corruption Act Court special judge chuan Lydia Lalhruaitluangi hi sawrkara a mawhphurhna ama tana hman khaw lohna (section 13 (1) (a), (b)/13(2) PC Act 1988), a kuta mawhphurhna ama mimal tana hman khaw lohna (section 406 IPC), sum chungthu ah a chunglama thuneitute bumna (section 420 IPC), inbumna atana lehkha lem siam (section 468 IPC) leh lehkha pawimawh lem a dik anga hmanna (section 471 IPC) te in thiamloh chantir a. Hetihlai hian a laizawnnu, a nu leh pa te chu dan a bawhchhiatna kawngah lo puibawma puhnaah finfiahna thatawk a awm lo nia ngaiin court chuan he thubuaiah hian an thiam lohna a hmu lo thung.
Thiam loh chantir a nihna 5-ah kum 4 lung in tan leh cheng nuai 20 chawi turin hremna a pe theuh a; chutihlaiin, fa pahnih enkawl mek a nih ang leh tunhma in heti ang chi ah thiamloh chantirna thubuai a la neih loh avangin, lung ina a tan hun tur hi lakawp (concurrent) tirin court hian kum 4 chhung tang turin a ti a. A sumfai chawi tur erawh lakawp loin a hrang theuh ami belhkhawmin cheng nuai 100 chawi turin a ti a ni. Sum chawi tur hi a pe thei lo a nih chuan kum 50 chhung lungin tan in a tlak ang. Sum chawitir tur tam lamah hian court chuan PC Act 1988 hnuaia section 16-na in a phut angin, a hlemhletna sum tam lam hisapin a tuk (impose) a ni.
Sum tichingpentu Lydia Lalhruaitluangi hi a hna atang hian 2018 August 21 khan maipar thlawntir a lo ni tawh a ni.