Eiruk tel loin fim takin ram kan kaihruai dawn

Hmasawnna a tan chhan chu eirukna vang a ni a, corruption tel loin fim takin ram an kaihruai dawn tih ZPM working president K Sapdanga chuan a sawi.
Thawhtannia an party office-a inkhawmah ZPM working president chuan, corruption laka fihlim turin ZPM candidate-te an intiam a, Val Upa Council huaihawtin chham leh ziakin an intiam leh a. An intiam angin hlemhletna lakah an fihlim em tih mipui fiah turin an inchhawpchhuak ngam a, fiah a, enchhin turin mipui an sawm tih a sawi. “Hmasawnna a tan tlat chhan chu eirukna vang a ni a, corruption tel loin fim takin ram kan kaihruai dawn a ni,” a ti.
MLA Fund eirua Pu Duhoma rinthua an puhna chu a ei ruk loh zia finfiahna an hmu nghal tih a sawi a. BJP nena sawrkar siam tuma an puhna chungchangah kumin May 17-a Headquarters executive committee-in BJP nen thawhho an tum loh thu resolution an lo siam tawh tih sawiin. “Eng ang pawhin min puh mah se, min puhtuten an awih lo a, BJP pawhin an awih lo. Keini phei chuan kan awih lo lehzual. Sawrkar inring loten sawrkar intawm a awm dawn, tiin party mal sawrkar siam phak an awm dawn loh thu an vawrhdarh a, vawikhat mah coalition sawrkar a la piang lo. Inthlan dawna thli nei apiangin majority sawrkar an din thin zawk,” a ti.
Sawrkar dinglai chu a thutiama hlawhchhamah puhin, mau policy-ah cheng vaibelchhe 6.48 hmanral hnuah an ngawihsan thu te, cheng nuai 3 sem hlawhchhamuin CM-in nuai thum sem a tiam laiin minister pakhat chuan nuai thum sem an tiam lo tih a sawi ve leh thu te, PAHOSS chu mi hausate in sakna tur pekbelhna mai niin PAHOSS in kawtah traffic a jam luih luih thin thu te, kawng chhawng hmel kan la hmu loa, CM-in May 2019 atanga Assam Rifles insawn chhuak tawh tura a sawi tun thlengin an la insawn loh thu te, health care policy-a sum luanral tam chungin a hlawhchham chian thu te K Sapdanga hian a sawi a ni.
“Kan party thil tum chu ram rorelnaa Pathian ram tundin a ni a, Pathian ram a thlenna hmunah hlemhletna a awm thei lo,” a ti.