Rajasthan State-ah Congress sorkar leh dawn?

November 25-a inthlang tur Rajasthan state-ah political parties te chuan tan an la nasa hle a, hetih lai hian ABP News leh C-Voter te chuan a rualin mipuite ngaihdan lakkhawmna an neihnaah mipui-voters te rilru leh an duhthlanna dik tak tarlanin a awm ve bawk a ni.
He public opinion poll neihnaah hian state chhunga politics vir vel te thlirna hmun hrang hrang atangin neih a ni a, hei hian mipuite rilru put hmang leh state-a rorel lai Congress party leh CM Ashok Gehlot a hnathawh dan te chiang taka pho langin election lo awm tura boruak a sosan dan tur te chiang takin a pholang a ni.
Rajasthan-a rorel lai Congress Party chuan ngaihven a hlawh hle a, opinion poll atanga a lan danin Congress party sorkar lai mek hnathawh dan chungchangah ngaihdan a phir nasa hle a ni. Zawhna chhangtu zawng zawng atanga za zela 42.1 (42.1%) te chuan sorkar hnathawh dan chu a tha tiin an chhang a, 16.9% te chuan a pangngai tinin an chhang ve thung a ni. A lehlam ve thungah chuan 41% te chuan a lungawi thlak loh tiin sorkar hnathawh chu ‘Poor’ tiin an chhang ve thung a ni. Zawhna dang rorel lai mek hi thlak an duh em tih zawhna chu chhangtu tamtak chuan an thinrim thu sawiin Congress kaihhruai sorkar chu thlak vat an duh thu an sawi a, hetianga chhangtute hi 49.1% an ni. Lehlamah ve thung chuan 21.8% te chuan sorkar lak an thinrim thu sawi ve mahse sorkar thlak kher erawh tul an ti lo a, 29.1% ve thung te erawh chu an thinrim lem lo a sorkar thlak pawh an duh chuang lo a ni.
Rajasthan state election lo awm tur hi Congress leh BJP te inbeihna ber tur a ni dawn a. Party pahnihte hian chhungkaw hung leh laina ngah te hi behchhanah hmang ve vein politician chhungkaw hlun atang te in candidate vawrh chhuah an tum ve ve dawn a, hei hian he state hi inthlah chhawng kal zel chhungkaw rorelna a ni tih a rawn ti lang a ni. Assembly constituencies 200 atangin BJP chuan candidate 124 a puang tawh a, Congress chuan seat 95 atanga rawtna te a la siam chauh thung a ni.