Israel chet lakna nasa zelah Gaza chhuahsan

Qatar atanga palai hna thawktute ruahmanna angin Nilaini khan inhliam avanga Gaza chhuahsan hmasatu pawl ten Egypt ramri an kan thu Egypt chanchinbu mite leh ramri-a cheng ten an sawi a, hei hi Israel sipaiten Hamas helho Palestine awpbehna hnuaia awmte thliar hran awlsam nana an tih a ni.
Heng inthiarfihlim te hi Rafah crossing thlengin Ambulance-in a hruai a. Egypt, Israel leh Hamas-te inremna ang chuan ram dang mi leh inhliam na zual tak tak te chu Gaza chhuahsan phal an ni. Palestinian health thuneitute sawi danin inhliam avanga Gaza chhuahsantute an kal mek laiin Israel te chuan air strike hmangin Gaza an bei leh a, refugee camp-a awm mi 50 laiin nunna an chan thu an sawi a ni. Israel te chuan thawhlehni-a kan beihnaah hian Hamas hruaitu senior te leh min beitu tamtak an thi a ni, tiin an sawi ve thung.
Israel chuan October ni 7-a Israel chhim lam Islamic group firfiak ten an beih thut avang khan Hamas awpbehna hnuaia awm mek chhanchhuak tur leh Hamas helho te bei turin Israel chuan a sipai chakna leh a ralthuamte a hmang ve chauh a ni, tiin a sawi ve thung a ni. Israel chuan Hamas te hnawtchhuak turin thu a tiam tawp mai a. Mahse mipui pawisawilo thihna a tam tial tial a, mihring mamawh leh chakkhai lakna kawng harsa tulh tulhin khawvel ram hrang hrang ngaihtuahna a tibuai sawt hle mai a, chaw, fuel, tui thianghlim in tur leh damdawi lam supply te a harsa-in vanduaina tuartu te enkawl pawh hospital lam tan thil harsa a tling tawh a ni. Egypt ram venhimna lama thuneitute sawi danin ramdang passport nei hrim hrim mi 500 te chuan Nilaini-ah Rafah border crossing an paltlang theih tur thu an chhuah tawh a. Thu dawnnain a sawi danin Nilaini zing thleng khan mi 200 velin Palestinian lam ramri velah ramri kan turin an nghah mek thu an sawi a ni.
Thu lakna hnar pahnihna sawi dan chuan Nilaini hian an vaia chhuah hman beisei a ni lo a. Chhuahna tura ruahman chu engtia rei nge a inhawn ang hriat a nih loh thu an sawi ve mek bawk a ni. Khawthlang ram thuneitute chuan mi tupawh ram dang passport neite chuan Gaza an chhuahsan thei ang tiin an sawi a, he thu hi Israel leh Egypt te, ram dang embassies thlengin a huam a ni. Israel thuneitu ten tu tih an hriat loh te chu Egypt nen an remtihna angin Gaza chhuahsan an phalsak bawk a ni. Egypt chuan Sinai hmunah hospital hmunpui a buatsaih thu damdawi lam thuneitu ten an sawi a. Rafah Crossing-ah Ambulance hman mai tur a awm reng thu an sawi bawk a ni.